पूर्वी लद्दाखमा चीनको अड्डीलाई मद्देनजर गर्दै भारतको जलसेनाले हिन्द महासागरमा आपतकालीन स्थितिको सामना गर्न विशेष तयारी गरेको छ । 

चीनले हिन्द महासागर क्षेत्रमा कुनै हर्कत गरेमा त्यसको तत्काल जवाफ फर्काउने हिसाबमा भारतले ध्यान केन्द्रित गरेको छ । यसका लागि भारतको जलसेना र वायुसेनाले विशेष रणनीति बनाइरहेका छन् । 

भारतीय जलसेना प्रमुख एडमिरल करमवीर सिंहले चीनबाट आउने समेत अनेकौं चुनौतीका बारेमा त्रान रहेको र सामना गर्न पूरै तयार रहेको बताए । 

भारतीय जलसेनाले आज स्थापना दिवस मनाइरहेको छ । त्यसको पूर्वसन्ध्यामा एडमिरल सिंहले हिन्द महासागरमा आफूहरूको तयारी रहेको बताए । भारतीय जलसेनाको विमान पी–८१ र हेरोन ड्रोन तैनाथ गरिएको उनले बताए । 

प्रस्तावित म्यारिटाइम थिएटर कमान्डका बारेमा कुरा गर्दै सिंहले यसको वास्तविक आकार केही समयमा देखिने बताए । पानीभित्रको क्षमता बढाउन भारतीय जलसेनाले जोड दिने उनले बताए । तेस्रो विमानवाहक युद्धपोत जलसेनामा समावेश गर्ने संकेत पनि उनले दिए । 

चीनको आक्रामकता बढिरहेको सन्दर्भमा हिन्द महासागरमा त्यसले पार्ने असरलाई हेरेर भारतले तेस्रो विमानवाहक पोतको सम्भावनामा विचार गरिरहेको छ । स्वदेशी युद्धपोत आईएनएस विक्रान्त सन् २०२२ सम्ममा जलसेनामा समावेश गरिने चर्चा छ । वायुशक्ति पनि आवश्यक रहेको उनले बताए ।