२९ असार २०८३, सोमबार
नेपाल कम्युनिस्ट पार्टी (नेकपा) स्थायी कमिटी बैठकका लागि नेकपा कार्यकारी अध्यक्ष पुष्पकमल दाहाल ‘प्रचण्ड’ लगायत नेताहरू पार्टी केन्द्रीय कार्यालय धुम्बाराही पुगेका छन् ।
पार्टी भित्रको विवाद सचिवालयले टुंग्याउन नसकेपछि स्थायी कमिटी बैठकमा छलफल हुन लागेको हो ।
पार्टी केन्द्रीय कार्यालय धुम्बाराहीमा आइतवार दिउँसो १ बसे स्थायी कमिटी बैठक बस्ने भनिए पनि बैठक शुरू हुन ढिलाइ भएको छ । पार्टीमा देखिएका विवाद समाधानमा सचिवालयले निकास दिन नसकेपछि नेकपाले स्थायी कमिटी बैठक बोलाएको हो । गत भदौ २६ गतेपछि पहिलो पटक स्थायी कमिटी बैठक बस्दैछ ।
सचिवालय बैठकमा कात्तिक २८ गते कार्यकारी अध्यक्ष पुष्पकमल दाहाल ‘प्रचण्ड’ले राजनीतिक प्रतिवेदन पेश गरेपछि नेकपा संकट गहिरिएको छ । प्रधानमन्त्री एवं नेकपा अध्यक्ष केपी शर्मा ओलीले प्रचण्डको आरोपको जवाफमा मंसिर १३ गते ५३ बुँदे प्रस्ताव पेश गरेका थिए ।
स्थायी कमिटी बैठक पार्टीभित्र देखिएका विवाद समाधानमै केन्द्रित हुने प्रवक्ता नारायणकाजी श्रेष्ठले बताएका छन् । नेकपा संसदीय दलका उपनेता एवं स्थायी कमिटी सदस्य सुवास नेम्वाङले प्रधानमन्त्री ओली स्थायी कमिटी बैठकमा सहभागी हुने लोकान्तरलाई बताए ।
