‘तिमीहरू उमेरतिर नजाऊ,’ डेव ह्वाटमोरले नेपालको प्रशिक्षक बन्नका लागि दिएको भर्चुअल अन्तर्वार्तामा हाँस्दै भनेको पहिलो वाक्य यही हो ।

नेपाल क्रिकेट संघ (क्यान) ले सेप्टेम्बर ३ मा नेपालको प्रशिक्षक बन्न आवेदन खोलेको थियो । त्यही आधारमा ७२ जनाले नेपालको प्रशिक्षक बन्न आवेदन दिएका थिए । त्यसमा एक उनै ह्वाटमोर थिए । ह्वाटमोर उमेरले ६६ वर्षका भइसकेका छन् । तर क्यानले प्रशिक्षकका लागि तोकेको उमेर हदबन्दीमा ६० वर्षमुनिको हुनुपर्ने जनाइएको थियो । नेपालको प्रशिक्षक बन्न छानिएका अन्तिम १२ को अन्तर्वार्ताको क्रममा ह्वाटमोर नेपाली पदाधिकारीहरूलाई जिस्किँदै उमेरतर्फ ध्यान नदेऊ भनिरहेका थिए ।

ह्वाटमोरको भनाइ थियो उमेर एउटा गणना हुने अंक मात्र हो । उनै ह्वाटमोरलाई क्यानले बिहीबार नेपालको प्रमुख प्रशिक्षकमा नियुक्त गरेको छ ।
‘

धेरै छलफलपछि हामीले मुख्य प्रशिक्षक सर्वसम्मत चयन गरेका छौं । हामीले ह्वाटमोरबाट धेरै आशा गरेका छौं,’ क्यानका अध्यक्ष चतुरबहादुर चन्दले भने, ‘नेपालको सम्भावना राम्रो छ भनेर उनले काम गर्ने इच्छा देखाएका छन् ।’ ६० वर्षमुनि हुनुपर्ने तोकिए पनि अन्तर्राष्ट्रिय क्रिकेट परिषद् (आईसीसी) बाट ह्वाटमोरको स्वीकृति लिइसकेको चन्दले जनाए । अन्तर्वार्ताका क्रममा एउटा प्रशिक्षकलाई आफ्नो कार्यक्रम राख्न र बोल्न २० मिनेटको समय तोकिएको थियो । चन्दका अनुसार ह्वाटमोर उत्साहित भएर २५ मिनेटसम्म आफ्नो भनाइ राखिरहेका थिए ।

ह्वाटमोर नेपाल आउन लागेका सबैभन्दा ‘हाइप्रोफाइल’ प्रशिक्षक हुन् । उनकै ‘मास्टर माइन्ड’ मा श्रीलंकाले सन् १९९६ को एकदिवसीय विश्वकप जितेको थियो । त्यसबाहेक उनी पाकिस्तान, बंगलादेश, जिम्बावे र सिंगापुरको प्रशिक्षक भए । पछिल्लो समय उनी सिंगापुरका प्रशिक्षक थिए । उनले १९९६ देखि २०१६ सम्म गरी श्रीलंका, पाकिस्तान, बंगलादेश र जिम्बावेबाट गरी ८७ टेस्ट र ३ सय १५ एकदिवसीय अन्तर्राष्ट्रिय खेलमा प्रशिक्षण गरेका थिए ।
उनकै प्रशिक्षणमा केरला सन् २०१७–१८ को रणजी ट्रफीमा क्वाटरफाइनल र २०१८–१९ मा सेमिफाइनलमा पुगेको थियो । त्यसअघि केरला कहिल्यै त्यो स्थितिमा पुगेको थिएन । ह्वाटमोर २०१० र २०११ मा इन्डियन प्रिमियर लिगमा कोलकाता नाइड राइडर्सको प्रशिक्षक थिए । सन् २००७ मा उनी भारतको प्रशिक्षक बन्नेक्रममा नजिक पुगेका थिए ।

उनी नेपाल आउन लागेका दोस्रो अस्ट्रेलियन प्रशिक्षक हुन् । सन् १९९८ मा काठमाडौंमा भएको दोस्रो एसीसी ट्रफीमा अस्ट्रेलियाका ब्रायन बिगिनले नेपाली टोली सम्हालेका थिए । श्रीलंकाको कोलम्बोमा जन्मिएका
ह्वाटमोर त्यति सफल खेलाडी रहेनन् । उनले अस्ट्रेलियाबाट ७ टेस्ट र एक एकदिवसीय अन्तर्राष्ट्रिय खेल खेलेका थिए । टेस्टमा उनले दुई अर्धशतक बनाएका छन् ।

ह्वाटमोरले नेपालको प्रशिक्षक भएवापत ८ देखि १२ हजार डलर मासिक पारिश्रमिक पाउनेछन् । करसहितको त्यो रकम ह्वाटमोर नेपाल आएर बस्दाको अन्य सुविधासहित रहेको छ । राष्ट्रिय खेलकुद परिषद् (राखेप) र युवा खेलकुद मन्त्रालयमार्फत नेपाल सरकारले यसअघि नेपाल क्रिकेटको विदेशी प्रशिक्षकको मासिक १० हजार डलरबराबरको पारिश्रमिक बेहोर्दै आएको थियो ।

काठमाडौंमा फेब्रुअरीमा भएको विश्व क्रिकेट लिग २ पछि भारतका उमेश पटवालले राजीनामा दिएयता नेपालको प्रमुख प्रशिक्षक पद रिक्त रहँदै आएको थियो । त्यसयता क्यानले नेपालका जगत टमाटालाई जिम्मेवारी दिएको थियो । ह्वाटमोर जनवरी १ देखि मुख्य प्रशिक्षकको पद सम्हाल्ने क्यानले जनाएको छ ।

उनी २०१७ को जनवरीमा यसअघि नै नेपाल आइसकेका थिए । उनलाई ब्याट एन्ड बल फाउन्डेसनले कोचिङ क्लिनिकका लागि नेपाल ल्याएको थियो । एक साताको त्यस कार्यक्रममा उनले नेपाली राष्ट्रिय टोलीमा रहेका खेलाडीलाई पनि प्रशिक्षण दिएका थिए । ह्वाटमोरले आफ्ना हाइप्रोफाइल म्यानेजर कौस्तभ लाहिरीमार्फत क्यानको विज्ञप्तिमा भनेका छन्, ‘डेव नयाँ चुनौतीका लागि निकै उत्साही छन् । उनले नेपाली क्रिकेटमा केही राम्रो प्रतिभा रहेका विश्वास लिएका छन् र उज्ज्वल भविष्य देखेका छन् ।’

क्यानको प्रशिक्षक बन्न आवेदन दिएकामध्येमा पुबुदु दासानायके पनि थिए, जसले नेपाललाई सन् २०१४ मा विश्व ट्वान्टी–२० खेलाएको थियो । विगतमा आफूहरूलाई अख्तियार पुर्‍याएको भनेर क्यान पदाधिकारीले दासानायकेलाई वास्ता गरेनन् । भारतका अपूर्व देशाईलाई बलियो दाबेदारको रूपमा हेरिएको थियो । सबै सहमत भए पनि अन्तिम समयमा देशाई र क्यानको फरक धारणा बनेपछि ह्वाटमोरलाई क्यानले लिएको थियो । देशाईलाई क्यानले वैकल्पिकमा राखेको छ ।  

म्यानेजरद्वयमा मल्ल र दास
क्यानले प्रशिक्षकबाहेक जनरल म्यानेजर (जीएम), क्रिकेट म्यानेजर (सीएम) र चिफ फाइनान्स अफिसर (सीएफओ) पनि नियुक्त गरेको छ । जीएममा रौनकबहादुर मल्ल, सीएममा विनोद दास र सीएफओमा रमेशकुमार न्यौपानेलाई चयन गरेको छ ।
राष्ट्रिय स्तरका खेलाडी मल्ल दुई वर्षअघि पोखरा प्रिमियर लिग (पीपीएल) मा लजिस्टिक म्यानेजर थिए । नेपाली राष्ट्रिय टोलीका पूर्वकप्तान दासले विगतमा एभरेस्ट प्रिमियर लिग र धनगढी प्रिमियर लिगमा निर्देशकको भूमिका निभाइसकेका छन् ।  कान्तिपुर दैनिकमा विनोद पाण्डेले खबर लेखेका छन् ।