२३ असार २०८३, मंगलबार
प्रधानमन्त्री केपी शर्मा ओलीले नेकपा वरिष्ठ नेता माधवकुमार नेपालले पार्टीमा अप्ठ्यारो पारेको आरोप लगाएका छन् ।
१५ वर्ष पार्टीको नेतृत्व गरेको व्यक्तिले अहिले नै फेरि नेतृत्व चाहिन्छ भन्ने जसरी आफूलाई असहयोग गरेको ओलीले गुनासो गरे ।
प्रधानमन्त्री निवास बालुवाटारमा आफूनिकट पूर्व सांसदसँगको भेलामा ओलीले नेता नेपाल सरकारविरुद्ध लागिपरेको आरोप लगाएका हुन् ।
‘माधव नेपालले १५ वर्षसम्म पार्टीको नेतृत्व गर्नुभयो, अहिले फेरि म नै हुनुपर्यो भनेर असहयोगी भूमिकामा देखिनुभयो । नेतृत्व उधारो होइन नगद नै चाहिन्छ भन्ने खालले प्रस्तुत हुनुभयो,’ ओलीको भनाइ उदृत गर्दै बैठकमा सहभागी एक नेताले लोकान्तरसँग भने, ‘जहिले पनि सरकारको विरुद्धमा लाग्ने प्रवृत्ति देखाउनुभयो । सरकारले राष्ट्रियताको बारेमा, विकास र समृद्धिको बाटोमा अगाडि बढेको समयमा उहाँले अवरोध गर्नुभयो ।’
ओलीले कोरोना महामारीको समयमा पनि सरकारले काम अगाडि बढाइरहेको भए पनि पार्टी भित्रबाटै सरकारको काममा भाजो हाल्ने काम भएको आरोप लगाए ।
आफूनिकट पूर्व सांसदहरूको भेलालाई सम्बोधन गर्दै ओलीले पार्टीकै नेताहरू सरकारविरुद्ध लागेका कारण प्रतिनिधिसभा विघटनको अवस्था आएको बताए । ‘अहिले मेरो स्वास्थ्य ठीक छ, यो सबै परिस्थितिलाई पार लगाउँछु । तपाईंहरू ढुक्क भएर चुनाव तयारीमा लाग्नुस्,’ ओलीको भनाइ उदृत गर्दै राष्ट्रिय सभाका सांसद खिमलाल भट्टराईले लोकान्तरसँग भने ।
