२१ असार २०८३, आइतबार
बेलायतको प्रभावशाली थिंकट्यांक संस्था च्याटम हाउसले भारतसँग धेरै अपेक्षा नगर्न बेलायत सरकारलाई चेतावनी दिएको छ ।
च्याटम हाउसले नयाँ प्रतिवेदन सार्वजनिक गर्दै लेखेको छ, ‘भारतलाई जति ध्यान दिनुपर्ने हो, त्यति मात्र दिए हुन्छ । भारतसँगको सम्बन्धबाट बेलायतले प्रत्यक्ष आर्थिक तथा कूटनीतिक लाभ पाउँदैन ।’
'ग्लोबल ब्रिटेन, ग्लोबल ब्रोकर' शीर्षकको यस रिपोर्टमा बेलायतसँग शक्ति भए पनि संसारभरि प्रभाव कम हुँदै गएकोमा पीर मानिएको छ ।
उक्त प्रतिवेदनले भारतलाई चार अप्ठ्यारा देशहरूको सूचीमा राखेको छ । यी देशहरू बेलायतका प्रतिद्वन्द्वी बन्ने बताइएको छ ।
चार देशहरू भारत, चीन, साउदी अरब र टर्कीलाई रिपोर्टमा डिफिकल्ट फोर भनिएको छ ।
भारतले अमेरिकासँग सम्बन्ध घनीभूत बनाउँदै गएकाले बेलायतसँगको सम्बन्ध कमजोर बनेको रिपोर्टमा लेखिएको छ । अमेरिकी प्रशासनहरूले द्विपक्षीय सम्बन्धलाई थप बलियो बनाएकाले बेलायत किनारमा परेको छ ।
रिपोर्टमा भारतको जटिल तथा छिन्नभिन्न राष्ट्रिय राजनीतिले गर्दा खुला व्यापार र विदेशी लगानीको प्रतिरोध गरिने उल्लेख छ । हिन्दू राष्ट्रवादले मुसलमान र अन्य अल्पसंख्यक धार्मिक समूहको अधिकार कमजोर बनाएको उल्लेख गरिएको छ ।
लोकतान्त्रिक देशहरू डी१० समूहमा भारतलाई संलग्न गर्नुको तुक नरहेको पनि प्रतिवेदनमा उल्लेख गरिएको छ ।
