आइतबार राजधानीबाट प्रकाशित भएका सबैजसो राष्ट्रिय दैनिकले काठमाडौंमा बर्डफ्लु देखिएको खबरलाई प्राथमिकताका साथ छापेका छन् । कान्तिपुर दैनिकका अनुसार काठमाडौंको तारकेश्वर नगरपालिका ७ स्थित फुटुङका एक किसानले पालेको हाँस र टर्कीमा नमुना परीक्षण गर्दा  फर्डफ्लु पुष्टि भएको हो । बर्डफ्लु पुष्टि भएसँगै २ हजार ५ सय ४४ पन्छी नष्ट गरिएको छ ।
उपत्यकामा बर्डफ्लु देखिएपछि सतर्कता अपनाउन आग्रह गरिएको खबर नागरिक दैनिकमा छापिएको छ ।

बर्डफ्लु एभियन इन्फ्लुएन्जा भाइरसको छोटकरी रुप हो । अहिले देखिएको बर्डफ्लु भाइरस एच५एन८ हो । विगतमा नेपालमा हाइली प्याथोजोनिक एभियन इन्फ्लुएन्जा अर्थात् एच५एन१ भेटिएको थियो ।
बर्डफ्लु कुखुरा, हाँस, टर्की, जंगली चराचुरुङ्गीलगायत पन्छीमा लाग्ने सरुवा रोग हो । यो जतिबेला जहाँ पनि फैलिन सक्ने विज्ञ बताउँछन् । यो रोग मानिसमा पनि सर्न सक्छ । खोकीको संक्रमण जस्तै हो बर्डफ्लु । जसले कुखुरा तथा पन्छीहरूमा विभिन्न समस्या निम्त्याउँछ । बर्डफ्लुको भाइरस कुखुराको मासु, प्वाँख, सिंगानर्, याल, सुली, दाना, अण्डा, अण्डा राख्ने क्रेट, दाना राखेको बोरा आदिको सम्पर्कबाट सर्ने विज्ञ बताउँछन् ।

अत्यन्त द्रुत गतिमा फैलिने र ज्यान लिनसक्ने भएकाले बर्डफ्लुलाई प्राणघातक रोगका रुपमा लिइन्छ । कुखुराको मासु ७२ डिग्री सेन्टिग्रेटभन्दा माथिको तापक्रममा पकाए भाइरस नष्ट हुने चिकित्सक बताउँछन् ।
पशुपति क्षेत्र विकास कोषले प्राचीन स्मारक संरक्षण ऐन र शैव दर्शनविपरीत हुने गरी पशुपतिनाथको शिवलिंगमा सुनको जलहरी राख्ने भएको खबर कान्तिपुर दैनिकमा छापिएको छ । प्राचीन स्मारक संरक्षण ऐनले सम्पदा स्थलमा कुनै पनि नयाँ संरचना राख्न निषेध गरेको छ ।

प्रधानमन्त्री केपी ओलीको निर्देशनपछि सुनको जलहरी राख्ने प्रक्रिया अघि बढेको हो । गत सोमबार प्रधानमन्त्री  ओलीले पशुपतिमा दर्शन र संकल्प पूजा गर्ने क्रममा काम अघि बढाउन निर्देशन दिँदै सरकारले तत्काल ३० करोड दिने घोषणा गरेका थिए ।

कान्तिपुरले नै मनाङको तल्लो भेग ताचै, थोंचे र तिल्चे क्षेत्रमा डढेलोले फेरि बितण्डा मच्चाएको खबर छापेको छ । मंसिर ११ बाट तोको र थान्चोकपारिको जंगलबाट सल्केको आगो करिब दुई महिनापछि माघ पहिलो साता मात्रै ताचै क्षेत्रबाट नियन्त्रणमा लिइएको थियो । त्यसको एक सातापछि ताचैमै जोडिने गरी अर्को डढेलो लागेको हो ।

नागरिक दैनिकले प्रचण्ड–माधव नेपाल समूहले धनगढीमा आयोजना गरेको विरोध सभा र केपी ओली समूहले चितवनमा गरेको सभाको समाचारलाई मुख्य समाचार बनाएको छ । दुबै कार्यक्रममा बोल्ने वक्ताले एकअर्कालाई आरोप प्रत्यारोप गर्न समय खर्चिएका थिए ।

अन्नपूर्ण पोस्टले ‘तल्लो अरुण अब बन्ने’ शीर्षकमा समाचार छापेका छ । ६७९ मेगावाटको जलविद्युत आयोजना भारतीय सरकारी कम्पनी सतजललाई दिने निर्णय सरकारले गरेको हो । शुक्रबार साँझ बसेको लगानी बोर्डको बैठकले उक्त आयोजनाको गाँठो फुकाएको हो ।
तल्लो अरुणको सर्वेक्षण अनुमतिपत्र ब्राजिलको कम्पनी ब्रास पावरले ओगटेर बसेको थियो । सर्तअनुसार काम गर्न नसक्दा अख्तियारको निर्देशनमा सरकारले अनुमतिपत्र खारेज गरेको थियो । उसले कामबिनै सरकारलाई १५ वर्ष झुलाएको थियो ।

सोही पत्रिकामा ‘ठेलामा बच्चा’ शीर्षकमा समाचार छापिएको छ । मजदुरी गर्नुपर्ने बाध्यताले बाबुआमाले दुई बच्चालाई ठेलामा छाडेर काममा जानुपर्ने बाध्यता रहेको समाचारमा उल्लेख गरिएको छ ।
नयाँ पत्रिकाले ‘खोपः अनुदानमा आस, खरिदमा अलमल’ शीर्षकमा समाचार छापेको छ । समाचारमा भनिएको छ– ७२ प्रतिशत अर्थात् दुई करोड १६ लाख नेपालीलाई खोप लगाउन चार करोड ३२ लाख डोज आवश्यक पर्छ ।

१० लाख डोज दिएको भारतले थप १० लाख दिने आश्वासन दिएको छ । चीन र बेलायतबाट केही लाख डोजको अपेक्षा, खरिदको भने टुंगो छैन । समाचारमा प्रधानमन्त्रीनै अलमलमा रहेको र तीन दिनमै बोली फेरिएको उल्लेख गरिएको छ ।  ओलीले शनिबार चितवनमा भने–अहिले नेपालमा खोप लगाउने क्रम अगाडि बढिरहेको छ । मैले भनेको छु, एकदमै फोरफ्रन्टमा रहेर, कठिनाइ झेलेर काम गर्नेहरूलाई खोप दिलाउने काम आगामी तीन महिनाभित्र हामी सम्पन्न गर्नेछौँ । बाँकी जनतालाई क्रमशः सन् २०२१ भित्र खोप लगाइसकेर कोभिड–१९ लाई हामी नेपालबाट भगाउनेछौँ । बाँकी विश्वले पनि भगाउँछ भन्ने हामीले विश्वास लिएका छौं । यसअघि ओलीले खोप अभियानको शुभारम्भका दिन भनेका थिए–कोही पनि नेपाल नागरिक वा नेपालमा बसोबास गरेका व्यक्तिले निःशुल्क यो खोप प्राप्त गर्नेछन् । चाहे हामी अनुदानका रूपमा प्राप्त गरौँ, जस्तो यसपल्ट प्राप्त गरेका छौँ, अथवा हामीले किन्न परोस् । करिब तीन महिनाभित्र हामीले सम्पूर्ण नेपालीलाई खोप उपलब्ध गराइसक्छौँ । मेरो विचारमा तीन महिना लाग्न सक्छ भन्ने लाग्छ ।

नयाँ पत्रिकामा नै ‘एक वर्षमा ३ शैक्षिक सत्रमा भर्ना’ शीर्षकमा समाचार छापिएको छ ।  त्रिभुवन विश्वविद्यालयको कानुन संकायअन्तर्गत एलएलबीमा तीन शैक्षिक सत्रको भर्ना एक वर्षमै हुने भएको छ । भर्ना हुने विद्यार्थी संख्याको विषयमा भएको विवादका कारण दुई वर्षअघि प्रवेश परीक्षाको फारम भरेका विद्यार्थीले समेत भर्ना पाएका थिएनन् । रोकिएको भर्ना खुलेसँगै ०७५ देखि ०७७ सम्मका तीन शैक्षिक सत्रको भर्ना अब एक वर्षभित्रै हुनेछ । शैक्षिक सत्र ०७५ को भर्ना यही महिना हुनेछ । तीनवर्षे एलएलबी अध्ययनका लागि सबैभन्दा बढी चाप हुने त्रिविको आंगिक नेपाल ल क्याम्पसमा शनिबार प्रवेश परीक्षा भएको छ । त्यस्तै, आगामी चैतमा शैक्षिक सत्र ०७६ को भर्ना लिने तयारी छ । त्यसपछि असोजमा शैक्षिक सत्र ०७७ को भर्ना लिने त्रिविको तयारी छ । शैक्षिक सत्र ०७५ मा भर्नाका लागि प्रवेश परीक्षाको प्रक्रिया सुरु भएपछि विद्यार्थीले खुला भर्ना गर्नुपर्ने माग गर्दै २६ वैशाख ०७६ मा नेपाल ल क्याम्पसमा तालाबन्दी गरेका थिए । अर्कोथरी विद्यार्थीले खुला भर्ना गर्न नहुने भन्दै सर्वोच्च अदालतमा रिट दायर गरेका थिए ।

सोही पत्रिकमा नेपाली सेनाले अन्ततः काठमाडौं–निजगढ फास्ट ट्र्याकअन्तर्गत फेज–टु खण्डमा आर्थिक प्रतिस्पर्धाबिना नै करिब १२ अर्बको ठेक्का लगाउने भएको समाचार छापिएको छ । प्रतिस्पर्धाको विकल्प बन्द भएकाले राज्यलाई ठूलो आर्थिक क्षति भएको छ । टेन्डरमा सहभागी हुन सेनाले यसअघि नै फेज– वानका लागि दुई र फेज– टुका लागि एक कम्पनी छनोट गरिसकेको छ । फेज– वानमा दुईवटा कम्पनीबीच दरभाउमा प्रतिस्पर्धा हुनेछ भने फेज– टुमा एउटा मात्रै कम्पनी छनोट भएकाले आर्थिक प्रतिस्पर्धा नै हुनेछैन ।

१६ वर्षमै निवृत्तिभरण पाउने व्यवस्था गर्न सैनिक नियमावली संशोधनका लागि रक्षा मन्त्रालयले गरेको प्रस्तावमा अर्थ मन्त्रालयले स्वीकृति दिएको खबर नयाँ पत्रिकाले छापेको छ । यसअघि सेनामा कार्यरत सबै सैनिकको निवृत्ति भरण अवधि २० वर्ष तोकिएको थियो ।

गोरखापत्रले दस  वर्षअघि  सुरु  भएको ‘जनता   आवास   कार्यक्रम’ अन्तर्गत   मुलुकभर  २० हजार भन्दा  बढी  परिवारले सुरक्षित  आवास  पाएको खबर गोरखापत्रले छापेको छ । सोही पत्रिकामा प्रधानमन्त्रीको भाषण, सुरुमा खोप लगाउन पाउँदा स्वास्थ्यकर्मीमा खुसीयाली छाएको सहितका अन्य औपचारिक कार्यक्रमका समाचार छापिएका छन् ।

राजधानी दैनिकले प्रतिनिधिसभा पुनःस्थापनाका सवालमा काँग्रेसमा दुई धार देखिएको खबर छापेको छ । यो सवालमा सभापति शेरबहादुर देउवा नरम देखिएपछि वरिष्ठ नेता रामचन्द्र पौडेल र नेता कृष्ण प्रसाद सिटौला आक्रामक देखिएको समाचारमा उल्लेख छ । यस्तै ई–पासपोर्ट ल्याउने प्रक्रिया अघि बढेको खबर पनि सोही पत्रिकामा छापिएको छ ।