शिक्षा मन्त्रालयबाट हालै सरुवा भएका सचिव गोपीनाथ मैनालीले उपराष्ट्रपति कार्यालयको सचिवका रुपमा रमाना बुझेका छन् । उनी शिक्षा मन्त्रालयबाट ५ महिनामै सरुवा भएका हुन् ।
कर्मचारी वृत्तमा इमान्दार छवि भएका उनी छिटोछिटो सरुवामा पर्दै आएका छन् । यद्यपि शिक्षा मन्त्रालयमै पनि आफूले छोटो कार्यकालयमा केही राम्रा काम गरेको मैनालीले दावि गरेका छन् । तर ‘नियतिले धेरै गर्न दिएन’ भन्दै उनले छोटो समयमै गरिएको सरुवाप्रति अनुसन्तुष्टि भने पोखेका छन् ।
‘शिक्षा मन्त्रालयमा धेरै कामहरु थालनी भएका छन्, जस्तो कि विद्यालय क्षेत्र सुधार योजना, संघीयता अनुरुपका कानून निर्माण, शिक्षक समायोजन, संगठन पुनसंरचना, छात्रवृत्ति व्यवस्थापन, नेपाली डायस्पोरासँग नेपाली शिक्षाको सहकार्य र उच्च शिक्षामा छात्रवृत्ति आदि’, उनले सामाजिक सञ्जालमा भनेका छन्, ‘नियतिले धेरै गर्न दिएन । सम्पन्न कामको निरन्तरता र अधुरा कामहरु संस्थात्मक सम्झनाका रुपमा हस्तान्तरण गरेको छु ।’

कोभिडको सन्त्रास, पठन पाठन र कक्षा १२ लगायतका परीक्षाहरु रोकिएको, डा गोविन्द केसीको आमरण अनसन जस्ता जटिल समस्या रहेको समयमा आफू शिक्षा मन्त्रालयको सचिवको जिम्मेवारी सम्हालेको पनि उनले स्मरण गरेका छन् । अनेकन समस्याका बावजुद ती सवै समस्याहरु एकएक गरी समाधान गर्ने सफलता मिलेको भन्दै उनले सन्तोष व्यक्त गरेका छन् ।
‘शिक्षा नियमावलीको नवौं संशोधन, शैक्षिक सत्र व्यवस्थापन, एसईई परीक्षाको नीतिगत निर्णयजस्ता कामहरु भए । कक्षा ११ को पाठ्यक्रम सम्बन्धी अन्योल पनि समाधान भयो’, उनले  यसकार्यमा आफूलाई मार्गदर्शन मन्त्रीलगायत सबैप्रति आभार प्रकट गरेका छन् ।