नेपाल कम्युनिस्ट पार्टी (नेकपा) ओली पक्षका प्रवक्ता प्रदीप ज्ञवालीले पार्टीलाई एकताबद्ध बनाएर लैजाने प्रयास जारी रहेको बताएका छन् ।

प्रधानमन्त्री केपी शर्मा ओलीको सरकारी निवास बालुवाटारमा बुधवार बसेको नेकपा ओली पक्षको स्थायी कमिटी बैठकपछि सञ्चारकर्मीहरूलाई प्रतिक्रिया दिँदै प्रवक्ता ज्ञवालीले यस विषयमा नयाँ ढंगले छलफल अगाडि बढ्ने विश्वास व्यक्त गरे ।

'पार्टी एकताको पक्षमा हामी सदैव रह्यौं । पार्टी एकतालाई ध्यानमा राखेर नै हामीले कसैलाई पनि कारवाही गरेका छैनौं । यसबीचमा गम्भीर राजनैतिक र वैचारिक मतभिन्नता भए, तर पनि पार्टीलाई एकताबद्ध बनाएर लैजान सकियोस् भन्ने हाम्रो प्रयास जारी छ,' ज्ञवालीले भने ।

उनले थपे, 'नयाँ ढंगले छलफलहरू अगाडि बढ्लान् । जो साथीहरू बाहिरिनुभाछ, उहाँहरूका ठोस प्रस्ताव पनि होलान् । एकता अमूर्त कुरा त होइन । त्यसका केही मूर्त कुराहरू होलान् । राष्ट्रिय राजनीतिलाई अगाडि लैजाने कुरामा उहाँहरूको बुझाइ के हो ?'

व्यक्तिगत तहमा नेकपा प्रचण्ड-नेपाल पक्षका नेताहरूसँग पनि कुराकानी भैरहेको उनले स्वीकारे ।

'व्यक्तिगत तहमा सम्पर्क, सम्बन्धहरू भइरहेका छन्, तर औपचारिक छलफलचाहिँ भा'छैन,' ज्ञवालीले भने ।

उनले प्रचण्ड-नेपाल पक्ष कांग्रेससँग सत्ता साझेदारी गरेर अगाडि बढे एकताको ठाउँ बाँकी नरहने बताए ।

'नेपाली कांग्रेससँग सत्ता समीकरणका बारेमा छलफल चलेको छ भन्ने पनि सुनेका छौं । छलफल चल्नुलाई हामी अस्वाभाविक मान्दैनौं तर त्यही बाटोमा हिँड्ने हो भने एकताको ठाउँ त कहाँ बाँकी रहलान् र ?' ज्ञवालीले भने ।

बैठकले प्रतिनिधि सभा पुनर्स्थापना गर्ने सर्वोच्चको फैसला कार्यान्वयन गरेर अघि बढ्ने निर्णय पनि गरेको प्रवक्ता ज्ञवालीले बताए ।