रुपन्देहीको बुटवलमा सम्पन्न चौथो खुला लन टेनिस प्रतियोगिताको उपाधि बुटवलका रितिक रानाले हात पारेका छन् ।

मंगलवार भएको रोमाञ्चक फाइनलमा सन्तोष खत्रीलाई ६–३, ७–५ को सोझो सेटमा पराजित गर्दै रितिकले उपाधि चुमेका हुन् । 

महिला एकलको उपाधि प्रेरणा कोइरालाले जितिन् । उनले फाइनलमा अभिलाषा विष्टलाई ६–३, ६–१ को सेटमा जीत निकाल्दै उपाधि हात पारिन् ।

रितिक र प्रेरणाले नगद ४५ हजार, कप, मेडल, प्रमाणपत्र तथा उपविजेताले नगद २० हजार, कप, मेडल, प्रमाणपत्र प्राप्त गरे । ५ दिनसम्म चलेको प्रतियोगिताको ३५ प्लसतर्फ कमल भण्डारीले सञ्जय प्रकाश श्रेष्ठलाई ६–२, ६–० को सेटमा पराजित गर्दै उपाधि चुमे । बुटवलका श्रेष्ठ पहिलोपटक फाइनल पुगेका हुन् ।

यसैगरी ४५ प्लसतर्फ चन्द्र शाही (यू एण्ड मि) ले धर्म लामिछानेलाई ६–४, ६–३ को सोझो सेटमा पराजित गर्दै उपाधि हात पारे । ५५ प्लसतर्फ हिमाल शाहले मनोज राणालाई ६–७, ६–२, १०–२ को सेटमा जीत निकाले ।

विजेता खेलाडीलाई नेपाल टेनिस संघका अध्यक्ष ज्योति राणा, बुटवल उपमहानगरपालिका–११ का वडाध्यक्ष रामचन्द्र क्षेत्री खनाल, नेपाल टेनिस संघका उपाध्यक्ष राजु श्रेष्ठ, मन जयकार टेनिस एकेडेमीका अध्यक्ष मनोज राणा, प्रमुख प्रशिक्षक कृष्णराज घले, टीम नेपालका अजय विष्ट, कास्की टेनिस संघका उपाध्यक्ष लोक गुरुङ, रुपन्देही लन टेनिस संघका अध्यक्ष सञ्जयप्रकाश श्रेष्ठ, उपाध्यक्ष अर्जुन गुरुङ, सचिव गोपाल ज्ञवालीले विजेता, उपविजेता खेलाडीलाई पुरस्कार वितरण गरेका छन् ।