३१ असार २०८३, बुधबार
नेकपा एमालेका प्रभावशाली नेता माधवकुमार नेपालले अध्यक्ष एवं प्रधानमन्त्री केपी शर्मा ओलीसँग दिउँसो भएको भेटवार्ताबारे आफूपक्षीय नेताहरूलाई ब्रिफिङ गर्दैछन् ।
ब्रिफिङका लागि नेता कार्यकर्तालाई अपराह्न ४ बजे बानेश्वरको एक होटलमा बोलाइएको छ ।
बुधवार र बिहीवारका लागि बोलाइएको कार्यकर्ता भेलाको तयारी र दिउँसो ओलीसँग भएको छलफलबारे ब्रिफिङका लागि बोलाइएको एक केन्द्रीय सदस्यले जानकारी दिए ।
अध्यक्ष ओली पक्षसँग मध्याह्न पार्टी कार्यालयमा भएको छलफल निष्कर्षमा पुग्न सकेको थिएन ।
बैठकमा सहभागी नेपालपक्षीय नेता भीम रावलका अनुसार फागुन २८ गतेका निर्णय खारेज गर्नुपर्ने प्रस्तावमा ओली सहमत नभएपछि बैठक निष्कर्षमा पुग्न सकेन ।
ओली पक्षले भने फागुन २८ गतेको निर्णयबारे आगामी केन्द्रीय कमिटी बैठकमा छलफल गर्न सकिने बताएको थियो ।
ओली पक्षले चैत्र ४ र ५ गतेका लागि बोलाइएको कार्यकर्ता भेला स्थगित गर्न माग गरेको छ ।
माधव नेपाल पक्षीय अर्का नेता सुरेन्द्र पाण्डेले बुधवारका लागि बोलाइएको कार्यकर्ता भेला स्थगित नहुने लोकान्तरलाई बताए ।
