०८ असार २०८३, सोमबार
ललितपुरमा आगलागीबाट बिहीवार १ वृद्धाको मृत्यु भएको छ ।
ललितपुर महानगरपालिका–१४ नख्खीपोटस्थित मगरटोल बस्ने ७६ वर्षीया दानदेवी खड्गीको घरमा बिहान आगलागी हुँदा जलेर मृत्यु भएको प्रहरी प्रधान कार्यालयले जनाएको छ ।
आगलागीमा परी गम्भीर घाइते भएकी खड्गीको पाटन अस्पतालमा उपचारका क्रममा मृत्यु भएको बताइएको छ ।
आगलागीबाट कोठाका फर्निचर तथा लत्ताकपडा गरी झण्डै १ लाख रुपैयाँ मूल्य बराबरको धनमाल नष्ट भएको छ ।
घटनाका विषयमा थप अनुसन्धान भइरहेको महानगरीय प्रहरी परिसर ललितपुरले जनाएको छ ।
गर्मी बढेसँगै अब आगालागी बढ्ने भएकाले सतर्क हुन गृह मन्त्रालयले सबैमा अनुरोध गरेको छ । मन्त्रालयअन्तर्गत रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार वैशाखयता मात्रै आगलागीका २ हजार बढी घटना हुँदा ७९ जनाको मृत्यु भएको छ ।
घटनामा ३३२ जना घाइते भएका छन् । आगलागीबाट १ अर्ब ५९ करोड रुपैयाँको क्षति भएको प्राधिकरणले जनाएको छ ।
