नयाँ सरकार गठनका लागि सत्ताइतर राजनीतिक दलहरू एकजुट भएपछि सरकारले ६ दिनमै हिउँदे अधिवेशन अन्त्य गर्ने निर्णयमा पुगेको छ ।

लुम्बिनी प्रदेश सरकारले भोलि मंगलवार राति १२ बजेदेखि प्रदेशको अधिवेशन अन्त्य गर्ने निर्णय गरेको हो ।

सोमवार बसेको मन्त्रिपरिषद् बैठकले अधिवेशन अन्त्य गर्ने निर्णय गरेको प्रदेश सरकारका प्रवक्ता तथा भौतिक पूर्वाधार तथा विकास मन्त्री बैजनाथ चौधरीले जानकारी दिए । 

गत असोज २० गते प्रदेशको स्थायी राजधानी र नामाकरण टुंगो लगाएपछि स्थगित भएको प्रदेशको हिउँदे अधिवेशन चैत १८ गतेदेखि लुम्बिनी प्रदेशको हिउँदे अधिवेशन शुरू भएको थियो । 

प्रवक्ता चौधरीले भने, ‘बैठक बसेर मात्र के गर्नु ? बिजनेश पनि छैन । त्यसैले अधिवेशन अन्त्य गर्ने सरकारले निर्णय गरेको हो ।’

चौधरीले सरकार मन्त्रिपरिषद् पुनर्गठन गर्ने तयारीमा रहेको बताए । उनले भने, ‘केही मन्त्रालयको पर्फर्मेन्स राम्रो नभएपछि मन्त्रालय थप गरी जिम्मेवारी हेरफेर गर्ने निचोडमा सरकार पुगेको छ । केही दिनमा त्यसको संकेत आउँछ ।’ 

नयाँ सरकार गठनका लागि कांग्रेस, माओवादी केन्द्र र जनता समाजवादी पार्टी हस्ताक्षर संकलनमा जुटेका छन् । एमाले प्रवेश गरेका २ सांसदलाई कारवाही गर्ने तयारीसँगै लुम्बिनीमा नयाँ सरकारको शुरू भएको छ । ८७ सदस्यीय प्रदेश सभामा नेकपा एमालेका ४१, माओवादी केन्द्रका २०, नेपाली कांग्रेसका १९, जसपाका ६ र राष्ट्रिय जनमोर्चाका १ सदस्य छन् । 

जनता समाजवादी पार्टी (जसपा) प्रमुख सचेतक सन्तोष पाण्डेयले नयाँ सरकार गठनका लागि सत्ताइतर शक्तिहरू छलफलमा जुटेको जानकारी दिए । उनले भने, ‘हामी निरन्तर छलफलमै छौं । निचोडमा पुगेका छनौं । अब प्रदेशका केही नयाँ संकेत देखिन्छ ।’

लुम्बिनी प्रदेशमा पनि ‘किङमेकर’ जनता समाजवादी छ । जसपा सत्तापक्ष र प्रतिपक्ष दुवैको तानातानमा छ ।

मुख्यमन्त्री शंकर पोखरेललाई सरकार जोगाउन ४४ मत आवश्यक पर्छ । एमालेकै २ जना प्रदेशसभा सदस्य माधव नेपाल समूहमा छन् । माओवादीका २ जना प्रदेशसभा सदस्यले माओवादी दल परित्याग गरी ओली नेतृत्वको एमालेमा प्रवेश गरेका छन् । अर्को दल प्रवेश गरेका रूपन्देहीका दधिराम न्यौपाने र गुल्मीका दिनेश पन्थीलाई नेकपा माओवादी केन्द्रको संसदीय दल र पार्टीले पनि कारबाही गर्दै कारबाही गरेको जानकारी प्रदेश सभामा दर्ता गरिसकेको छ ।

माओवादी केन्द्रका प्रमुख सचेतक तुलाराम घर्तीले आफूहरू छलफलमा जुटेको जानकारी दिए ।