सरकारको काम कामकारवाहीको विषयलाई लिएर सत्तापक्ष र प्रमुख प्रतिपक्षी दलका सांसदहरूबीच संसदमा जुहारी चलेको छ ।

बिहीवार बसेको प्रतिनिधि सभा बैठकमा एमालेका सांसदहरूले सरकारको कामको बचाउ गरे भने प्रतिपक्षी सांसदहरूले सरकारले जनतालाई ढाँट्ने काम काम गरेको आरोप लगाए । 

नेकपा एमालेका महेश बस्नेत, राजेन्द्र गौतम, शान्ता चौधरी लगायतले सरकारको कामको प्रशंसा गरे भने नेपाली कांग्रेसका गगन थापा, मोहन पाण्डे, देवप्रसाद तिमल्सिना र जसपाकी लीला सिटौलाले सरकारको कामको विरोध गरे । 

एमालेका महेश बस्नेतले अस्थिरता चाहनेहरूले प्रधानमन्त्री केपी शर्मा ओली र सरकारको कामको विरोध गरिरहेको आरोप लगाए । 

‘आइ हेट पोलिटिक्स भन्नेहरू आइ लभ यु केपी ओली भन्दैछन् । धरहराको उद्घाटन हुँदैछ । तामाकोशी उद्घाटन हुँदैछ । मेलम्चीको पानी आयो, यो कुराले किन केही माननीयको प्रेसर बढेको छ ?’ बस्नेतले भने, ‘प्रेसर बढेमा सरकारले गंगालाल अस्पतालको स्तरोन्नति गरेको छ ।’

बस्नेतभन्दा अगाडि बोलेका गगनले प्रधानमन्त्री केपी शर्मा ओलीले आफ्नो कार्यकालमा सबैभन्दा धेरै विकास भयो भनेर भन्ने गरेकोप्रति कटाक्ष गरेका थिए ।

'यति धेरै विकास निर्माणको काम त कहिल्यै भएको थिएन, यो त चमत्कार भयो भनिरहनुभएको छ । प्रधानमन्त्रीलाई चमत्कार भयो भन्ने किन लागिरहेको छ ? यसमा दुईवटा कारण हुनसक्छ,' थापाले भने, 'एउटा कारण, वास्तविकता के छ भन्ने प्रधानमन्त्रीलाई ज्ञान छैन, चरम अल्पज्ञान वा ढाँट्ने बानी लागेको छ, विकृत असत्य भाषण । यो दुवै कुरा राष्ट्रका निम्ति हानिकारक छ, खराब छ ।'

एमालेका राजेन्द्र गौतमले समृद्ध नेपाल र सुखी नेपालीको राष्ट्रिय संकल्प अगाडि सारी आर्थिक विकासलाई तीव्ररूपमा अगाडि बढाउन भौतिक पूर्वाधारको तीव्र विकास गर्दै अगाडि बढिरहेको छ । ‘के सरकारले बिजनेस दिएन ? एमसीसी दर्ता भएको कति समय भयो ? यसलाई रोक्नु संवैधानिक कदम हो सभामुख महोदय ?’ उनले भने ।

नेपाली कांग्रेसका देवप्रसाद तिमल्सिनाले सरकारको अकर्मण्यताका कारण काठमाडौं विश्वकै प्रदूषित शहर बन्न पुगेको आरोप लगाए । 

‘स्वदेशका अर्बौंका काठ बेच्न नसक्ने कमिसन खान मलेसियाबाट खर्बौंका काठ ल्याएर कमिसन खाने चक्करमा लाग्दा अहिलेको प्रदूषण भएको हो,’ उनले भने ।