मेलम्चीको पानी वितरण गर्ने भनिएका काठमाडौं उपत्यकाका कतिपय स्थानमा आवश्यक संरचना नबनेका कारण पानी वितरण हुन सकेको छैन ।

काठमाडौं उपत्यकामा चक्रपथभित्र धेरै ठाउँमा खानेपानी वितरण गरिरहे पनि आयोजना कार्यान्वयन निर्देशनालयले संरचना बनाइरहेको स्थानमा अहिले पानी वितरण शुरू हुन नसकेको हो । 

कतिपय स्थानमा पाइप बिच्छ्याउन, लिफ्ट बनाउन वा क्रसिङमा आवश्यक संरचना बनिनसकेको निर्देशनालयले जनाएको छ । पहिलो चरणमा पानी वितरण हुने स्थानमा मध्यपुरठिमी, भक्तपुर, कीर्तिपुर लगायतका स्थानमा संरचना बन्न बाँकी भएको काठमाडौं उपत्यका खानेपानी लिमिटेडका प्रमुख कार्यकारी अधिकृत मिलन शाक्यले बताए ।

उनका अनुसार चक्रपथभित्र र आसपासका क्षेत्रमा मात्रै अहिले पानी वितरण भइरहेको छ । उनले भने, ‘कीर्तिपुर र भक्तपुर जिल्लामा थप पानी आएपछि र संरचना बनिसकेपछि मात्र पानी वितरण हुनेछ ।’

लिमिटेडले कीर्तिपुरमा लिफ्ट बनाइरहेको छ र त्यो बनिसकेपछि त्यहाँ पानी वितरण हुनेछ । 

मध्यपुरमा क्रसिङमा आवश्यक संरचना निर्माण भएको छ । त्यो सेटिङ हुन कम्तीमा २८ दिन लाग्ने निर्देशनालयका सूचना अधिकारी जगत प्रजापतिले बताए । उनका अनुसार त्यहाँ काम शुरू भएको २ हप्ता भयो । अबको २ हप्तामा पानी वितरण गर्न सकिने उनले बताए ।

उनले भने, ‘ठिमीको ट्यांकीमा पानी गइसकेकाले अब २ हप्तामा त्यस क्षेत्रका वासिन्दाले पनि पानी पाउने छन् ।’ 

राष्ट्रिय गौरवको मेलम्ची खोपानी आयोजना निर्माण शुरू भएको २ दशकमा सम्पन्न भएपछि अहिले उपत्यकामा पानी ल्याइएको छ । मेलम्चीको पानी काठमाडौंसम्म ल्याउन सुरुङ, ‘हेडवर्क’ र प्रशोधन केन्द्र निर्माणको जिम्मेवारी मेलम्ची खानेपानी आयोजनाको हो । यसमध्ये सुरुङ र प्रशोधन केन्द्र सम्पन्न भएकाले पानी वितरण भइरहेको छ ।

सुन्दरीजलबाट उपभोक्ताका घरघरसम्म पानी वितरणका लागि आवश्यक ट्यांकी र पाइपलाइन बनाउने काम आयोजना कार्यन्वयन निर्देशनालयले गरिरहेको छ । पानीको वितरणको काम लिमिटेडले गरिरहेको छ । 

निर्देशनालयले उपत्यकामा १० स्थानमा ट्यांकी निर्माण गर्ने योजना बनाएकामा हालसम्म ९ ट्यांकी निर्माण सम्पन्न भइसकेको छ भने भक्तपुरको कटुञ्जेमा निर्माण भइरहेको छ । यी सबै पोखरीमा निर्देशनालयले परीक्षणसमेत गरिरहेको छ । अहिले उपत्यकामा अधिकांश स्थानमा पुरानै पाइपलाइनबाट पानी वितरण भइरहेको निर्देशनालयले जनाएको छ ।