१६ असार २०८३, मंगलबार
लुम्बिनी प्रदेश सभाको विशेष अधिवेशन वैशाख १९ गते बस्ने गरी आह्वान भएको छ ।
प्रदेश सभामा मुख्यमन्त्री शंकर पोखरेलविरुद्ध अविश्वासको प्रस्ताव दर्ता गरेसँगै दलहरूले माग गरेअनुसार विशेष अधिवेशन बोलाइएको हो ।
प्रदेश प्रमुखको कार्यालयले १९ गते आइतवार दिउँसो १ बजे बैठक बस्ने प्रदेशसभा सचिव दुर्लभकुमार पुन मगरले लोकान्तरलाई जानकारी दिए ।
गत चैत २४ गते १ हप्तामै प्रदेश सभाको अधिवेशन अन्त्य गरिएको थियो । गत वैशाख ६ गते नेपाली कांग्रेस, नेकपा माओवादी केन्द्र, जनता समाजवादी पार्टीका सांसदले मुख्यमन्त्री पोखरेलविरुद्ध प्रदेश सभामा अविश्वासको प्रस्ताव दर्ता गरेका थिए ।
अविश्वासको प्रस्ताव दर्तासँगै प्रदेश प्रमुखको कार्यालयमा विशेष अधिवेशन बोलाउन समावेदन पेश गरिएको थियो । अविश्वासको प्रस्तावमा हस्ताक्षर गरेका सन्तोषकुमार पाण्डेय, विजयबहादुर यादव, सुमन शर्मा रायमाझी र कल्पना पाण्डे मन्त्री बनेका छन् ।
पार्टीको निर्णय बाहिर गएर सरकारमा गएपछि अहिले जनता समाजवादी पार्टी (जसपा) मा तीव्र विवाद छ । जसपाका ४ सांसद आफूतिर तानेपछि लुम्बिनी प्रदेशका मुख्यमन्त्री पोखरेलले आफ्नो सरकारलाई सुरक्षित बनाएका छन् ।
