३१ असार २०८३, बुधबार
भारतको नोयडामा कोभिडका कारण थलिएका एक साथीलाई अक्सिजन सहायता उपलब्ध गराउनका लागि ३८ वर्षीय शिक्षकले १४ सय किलोमिटर यात्रा गरेका छन् ।
देवेन्द्र नाम गरेका ती शिक्षक झारखण्डको बोकारोबाट तीनवटा राज्य पार गरेर २४ घन्टामा अक्सिजन सिलिन्डर लिएर नोयडा पुगेका थिए ।
आइतवार दिउँसो डेढ बजेतिर हिँडेका उनी भोलिपल्ट त्यही समयतिर नोयडामा साथी रञ्जन अग्रवालको घर पुगेका थिए । दिल्लीको एक आईटी कम्पनीमा काम गर्ने रञ्जनका मातापिताले अक्सिजनका लागि हारगुहार गर्दा पनि पाएका थिएनन् ।
त्यसो त बोकारामा पनि सिलिन्डर पाउन सजिलो थिएन । देवेन्द्रले शहरका विभिन्न अक्सिजन प्लान्ट र आपूर्तिकर्ताकहाँ जाँदा खाली सिलिन्डर ल्याए मात्र भरिएको सिलिन्डर दिइने भनिएको थियो ।
अन्तिममा उनी बालिदिह औद्योगिक क्षेत्रमा रहेको झारखण्ड स्टील अक्सिजन प्लान्ट पुगेका थिए । त्यहाँको प्राविधिकले केही पैसा धरौटी राखेर भरिएको सिलिन्डर दिए ।
देवेन्द्रले धरौटीका लागि १० हजार भारु, अक्सिजनका लागि ४०० भारु तिरे अनि नोइडासम्मको लामो यात्रामा निस्के । उनलाई बिहार र उत्तर प्रदेशमा दुईपटक प्रहरीले रोकेको थियो तर साथीको अवस्थाका बारेमा बताएपछि छोडिदिएको थियो ।
उनी समयमै पुगेर रञ्जनलाई अक्सिजन दिन सफल भए ।
रञ्जनको स्वास्थ्य स्थिर छ र उनी पूरा निको नहुन्जेल आफू नोयडामै बस्ने देवेन्द्रले बताए ।
