१७ असार २०८३, बुधबार
कोरोना भाइरस संक्रमित बिरामीको चाप बढेपछि रुपन्देहीको बुटवलस्थित लुम्बिनी प्रादेशिक अस्पतालमा अक्सिजन अभाव भएको छ ।
बिरामीको चाप अत्याधिक र अक्सिजन आपूर्ति पुरानै अवस्थामा हुँदा अभाव खड्किएको हो ।
लुम्बिनी प्रादेशिक अस्पतालका सूचना अधिकारी विष्णु गौतमले अस्पतालमा केही घण्टाका लागि मात्र अक्सिजन मौज्दात रहेको र तत्काल थप अक्सिजन आइनपुगे उपचार प्रभावित हुने बताए ।
‘अस्पतालमा अहिले दैनिक २०० सिलिण्डरको माग छ । आपूर्ति दैनिक ८०–१०० सिलिण्डर मात्र छ । त्यसैले गर्दा अभाव खड्कियो अब । आपूर्ति नबढाउने हो भने अवस्था डरलाग्दो हुनेछ,’ उनले भने ।
बुटवलमा मात्रै अहिले दैनिक ३०० भन्दा बढी कोरोना संक्रमित थपिँदै गएका छन् । अस्पतालका लागि नेपालगञ्जबाट अक्सिजन सप्लाइ हुने गर्छ । अभाव हुन थालेपछि अन्य सप्लायर्ससँग पनि आपूर्तिको पहल भइरहको गौतमले लोकान्तरलाई बताए ।
प्रादेशिक अस्पताल मातहत रहेको धागो कारखानास्थित कोरोना विशेष अस्पताल सञ्चालन गरिरहेको लुम्बिनी प्रादेशिक अस्पतालमा पहिले १५० सिलिन्डर लगिँदै आएकोमा अहिले त्यहाँ पनि माग बढेको छ ।
‘बुधबार साँझ ६० वटा मात्रै सिलिन्डर झर्यो,’ उनले भने, ‘अहिले केही सिलिण्डर मात्र बाँकी छन् ।’
अस्पतालको फिवर क्लिनिकमा आउने कोरोना शंका लागेका बिरामीलाई पनि इमर्जेन्सीमा राखेर उपचार गरिन थालिएको छ । अस्पतालमा दैनिक २०० भन्दा बढी बिरामी आउने गर्छन् ।
अस्पतालका अध्यक्ष सूर्यबहादुर भट्टराईले सप्लाइ नबढ्दा अस्पतालले धान्न नसकेको लोकान्तरलाई जानकारी दिए ।
