०३ असार २०८३, बुधबार
साउदी अरबको भ्रमणमा रहेका पाकिस्तानी प्रधानमन्त्री इमरान खानले उक्त देशसँग कैयौं सम्झौता गरेका छन् ।
साउदीले पाकिस्तानलाई विभिन्न सहयोग गरेकोमा चामलको १९ हजार ३२ वटा बोरा पनि दिएको छ । तर साउदीबाट यसरी जकात लिएकोमा पाकिस्तानीहरूले इमरान खानलाई आलोचना गरेका छन् ।
साउदी अरबका युवराज मोहम्मद बिन सलमानले दिएको यो जकातबाट पाकिस्तानको खैबर पख्तूनख्वाह र पञ्जाबका एक लाखभन्दा बढी मानिसलाई सहायता पुग्नेछ ।
तर यसको आलोचना भएको छ । अमेरिकाका लागि पाकिस्तानका पूर्व राजदूत हुसैन हक्कानीले नाम नलिइकन इमरान खान सरकारको आलोचना गरेका छन् ।
उनले ट्वीट गरे, ‘केही समय अघिसम्म चामलको सबभन्दा ठूलो निर्यातक रहेको पाकिस्तानले साउदी अरबसँग सहायताका रूपमा ४४० टन चालम किन लिनुपरेको हो ? साउदीलाई उसको उदारताका लागि धन्यवाद धन्यवाद दिँदै देशको विफलताको आत्ममन्थन पनि गर्नुपर्ने भएको छ ।’
अमेरिकाको कनेक्टिकट विश्वविद्यालयमा पाकिस्तानी रिसर्च स्कलर मारवी सिरमदले हक्कानीको ट्वीटमा प्रतिक्रिया दिए । उनले लेखे, ‘पञ्जाबका मध्यम स्तरका किसानहरूका लागि चामल उब्जनी गर्नु सहज छैन । त्यहाँ पानी छैन । किसानहरूले कुनै सब्सिडी पाउँदैनन् । दलालहरूले बीचमा धेरै फाइदा लिन्छन् । किसानहरूलाई बेवास्ता गरिएकाले थाकिसकेका छन् ।’
अन्य मानिसले चाहिँ चामल जस्तो कुरा भिक्षाका रूपमा लिनुपर्दा देशै लज्जित भएको प्रतिक्रिया दिए । एकजनाले मरुभूमिमा चामल फल्छ र साउदीले पाकिस्तानलाई दिएको भनी प्रश्न गरे ।
