नेकपा एमालेले बागमती प्रदेशको रिक्त राष्ट्रियसभा सदस्य पदको उपनिर्वाचनमा आधिकारिक उम्मेदवारलाई मत नदिने जनप्रतिनिधिप्रति आपत्ति जनाएको छ ।

प्रधानमन्त्री निवास बालुवाटारमा बिहीवार बसेको एमाले स्थायी कमिटी बैठकले पार्टीका आधिकारिक उम्मेदवारको विपक्षमा मतदान गर्नेप्रति भर्त्सना गरेको छ । 

‘पार्टी निर्देशनको अवज्ञा गर्ने कतिपय नेता र जनप्रतिनिधिले विपक्षमा मतदान गरेकोमा बैठकले गम्भीरतापूर्वक रूपमा लिएको छ । पार्टीका आधिकारिक उम्मेदवारको विरोध गर्ने, विपक्षमा मतदान गर्नेको भर्त्सना गरेको छ,’ बैठकपछि प्रवक्ता प्रदीप ज्ञवालीले भने । नेकपा एमालेले रामबहादुर थापा ‘बादल’लाई उम्मेदवार बनाएको थियो ।

बिहीवार भएको उपनिर्वाचनमा एमालेको माधव नेपाल पक्षले नेपाली कांग्रेस र नेकपा माओवादी केन्द्रले समर्थन गरेका खिमलाल देवकोटाको पक्षमा मतदान गरेको थियो ।