१९ असार २०८३, शुक्रबार
नुवाकोटको ककनी गाउँपालिकाले कोरोनाबाट ज्यान गुमाएका व्यक्तिका परिवारलाई किरिया खर्चबापत २५ हजार र संक्रमितलाई ५ हजार रुपैयाँ उपलब्ध गराउने भएको छ ।
गाउँ कार्यपालिकाको बुधवारको बैठकले कोरोना रोगबाट ज्यान गुमाएका व्यक्तिको परिवारलाई स्थानीय सरकारको तर्फबाट किरिया खर्चबापत २५ हजार रुपैयाँ दिने निर्णय गरिएको गाउँपालिकाका अध्यक्ष मानबहादुर लामाले जानकारी दिए ।
ककनी गाउँपालिकामा पछिल्लो १ साताको अवधिमा कोरोना रोगबाट ३ जनाको निधन भएको र संक्रमितको दर अनपेक्षित रूपमा बढेसँगै रोकथामका लागि आवश्यक सबै कदम चाल्न लागिएको उपाध्यक्ष सीता खतिवडाले बताइन् ।
गाउँपालिकाले ३१ शय्याको कोभिड–१९ अस्थायी अस्पताल सञ्चालन गरेर चौबिसै घण्टा चिकित्सक सहितको जनशक्ति र अक्सिजन सहितको स्वास्थ्य उपचार सेवाको प्रबन्ध मिलाएको छ ।
काठमाडौं उपत्यकाको फोहोर बिसर्जन प्रभावित क्षेत्रका वासिन्दाको काठमाडौं महानगरपालिकामार्फत परीक्षण गराएका कारण ककनीभित्रै बसोबास गर्ने ३०० भन्दा बढीलाई संक्रमण देखिएको गाउँपालिकाको स्वास्थ्य शाखाले जनाएको छ । हाल पालिकामा सक्रिय संक्रमितको संख्या ७३ रहेको छ ।
