०६ साउन २०८३, बुधबार
इजरायलमा आठ पार्टीहरूको विपक्षी गठबन्धनले सरकार बनाउने घोषणा गर्दै आफूहरूसँग बहुमतका लागि आवश्यक ६१ सांसदको समर्थन रहेको बताएको छ ।
तर बहालवाला प्रधानमन्त्री बेन्जामिन नेतान्याहुले हार मान्न अस्वीकार गरेका छन् । उनले कट्टर राष्ट्रवादी दाउ खेल्दै देशलाई वामपन्थी रुझान राख्ने पार्टीबाट बचाउन अपील गरेका छन् ।
राजनीतिक विश्लेषकहरूका अनुसार, विगत १२ वर्षदेखि इजरायलको सत्तामा रहेका नेतान्याहुको राजनीतिक पतनको यो आरम्भ हो । तर अन्य विश्लेषकले विपक्षी गठबन्धनमा विचारधाराको टक्कर हुने देखेका छन् । गठबन्धनको भविष्यकै विषयमा पनि प्रश्न उठेको छ ।
नेतान्याहुले विपक्षीलाई तारो बनाउँदै खतरनाक वामपन्थी सरकार बन्न लागेको बताए । यसलाई देशका सबै दक्षिणपन्थी नेताहरूले विरोध गर्नुपर्ने उनको भनाइ छ ।
नेतान्याहुले प्रधानमन्त्रीको शपथ लिन ठिक्क परेका नफ्ताली बेनेट र गठबन्धनका अगुवा याइर लापिडले आआफ्नो दललाई वामपन्थी र इस्लामिक रुझान राख्ने युनाइटेड अरब लिस्ट पार्टीलाई बेचेको आरोप लगाए ।
नेतान्याहुलाई सरकार बचाउनका लागि ११ दिनको समय छ । उनले केही सांसदहरूलाई दल परिवर्तन गर्न फकाउनुपर्नेछ ।
कुरा नमिलेमा देश पुनः आमनिर्वाचनमा जान सक्छ । दुई वर्षमा चारपटक आमनिर्वाचन भइसकेको छ ।
