२६ जेठ २०८३, मंगलबार
नेकपा एमालेका वरिष्ठ नेता झलनाथ खनालले पार्टीलाई एकताबद्ध बनाउन अपिल गरेका छन् ।
देशका प्रमुख दलहरू र तिनका नेताहरू बीचको अनावश्यक टकराव, महत्त्वाकांक्षा र व्यक्तिगत इगो साँध्ने कार्य यथाशीघ्र अन्त्य गरिनुपर्ने उनले बताए ।
उपचारका लागि भारतको राजधानी दिल्ली जानुअघि एक अपिल प्रकाशित गर्दै खनालले पार्टीलाई फुटतर्फ धकेल्न नहुने बताएका हुन् ।
‘पार्टीलाई फुटतर्फ धकेल्ने होइन, धैर्य र संयमका साथ एकता जोगाउने प्रयत्न गर्यौं भने मात्र हामी सफल हुन सक्छौँ र सिङ्गो राष्ट्रको नेतृत्व गर्न सक्छौं । त्यसैले टुट–फुट र विभाजन होइन एकता गर्ने गराउने कार्यमा अगाडि बढौं भन्ने सबैमा आह्वान गर्न चाहन्छु,’ खनाललेअ पिलमा भनेका छन् ।
मिर्गौलामा समस्या देखिएपछि खनाल उपचारका लागि आज नयाँ दिल्ली जाँदैछन् । एपोलो अस्पतालमा खनालको उपचार हुनेछ ।
‘उपचारको क्रममा आएका एकपछि अर्को स्वास्थ्य समस्याका कारण डाक्टरहरूको सल्लाहमा म आज केही दिनका लागि देशबाहिर जाँदैछु । मेरो स्वास्थ्यलाभको कामना गर्नुहुने सम्पूर्णमा आभार व्यक्त गर्न चाहन्छु । सफल उपचारपछि म स्वदेश फर्केर यहाँहरूमाझ पुनः हुनेछु भन्ने विश्वास लिएको छु,’ खनालले भनेका छन् ।
हेर्नुहोस अपिल :
प्रेस वक्तव्य !!!
आदरणीय दिदीबहिनी तथा दाजुभाइहरू,
उपचारको क्रममा आएका एकपछि अर्को स्वास्थ्य समस्याको कारण डाक्टरहरुको सल्लाहमा म आज केहि दिनका लागि देश बाहिर जाँदैछु । मेरो स्वास्थ्य लाभको कामना गर्नुहुने सम्पूर्णमा आभार व्यक्त गर्न चाहान्छु । सफल उपचार पछि म स्वदेश फर्केर यहाँहरू माझ पुनः हुनेछु भन्ने विश्वास लिएको छु ।
देशको बिथोलिएको वर्तमान राजनैतिक अवस्थाले मलाई धेरै चिन्तित बनाएको छ । राजनैतिक दलहरु विवाद र ध्रुवीकरणले विभाजन उन्मुख भएका छन् । त्यही अन्तर संघर्षको पराकम्प हाम्रो तत्कालिन पार्टी नेपाल कम्युनिष्ट पार्टी (नेकपा) मा पर्यो र अहिले नेकपा (एमाले) मा परिरहेको छ ।
राष्ट्रिय एकता-अखण्डता लोकतन्त्र र स्थायित्वको खम्बाको रुपमा रहेका दलहरूभित्र यस्तो हुनु देश, जनता, लोकतन्त्र, विकास र समृद्धिका निम्ती दुर्भाग्यपूर्ण अवस्था हो । त्यसैले देशका प्रमुख दलहरु र तिनका नेताहरु बीचको अनावश्यक टकराव, महत्त्वाकांक्षा र व्यक्तिगत इगो साध्ने कार्य यथाशीघ्र अन्त्य गरिनु पर्दछ । हामी सबै एकजुट भएर मुलुकका मूलभूत समस्याहरु हल गर्नु पर्दछ भन्ने कुरा म सबैलाई आग्रह गर्न चाहान्छु ।
हाम्रो पार्टी नेकपा (एमाले) सयौँ सहिदहरुको बलिदान, हजारौं योद्धाहरुको रगत पसिना, कैयौँको प्रवास, जेल, भूमिगत जीवनको संघर्ष, त्याग र तपस्याको कारण सफलताको यो बिन्दुसम्म आइपुगेको हो । सो त्यागले यो पार्टी देशको नेतृत्वदायी पार्टी बनोस्, राष्ट्र र जनताको हित तथा विकास र समृद्धिको बाहक बनोस् र बन्नेछ भन्ने अपेक्षा राखेको छ ।
तर त्यो जनताको चाहना र अपेक्षा विपरित हामीमा देखिएको अनेकौं गलत प्रवृत्तिहरू, बदलाको भाव र अनावश्यक ईगोका कारण पार्टी जीवनमा यतिखेर गम्भीर संकट उत्पन्न भएको छ । देश, लोकतन्त्र र पार्टीको यो अवस्थाले मलाई अत्यन्तै चिन्तित बनाएको छ ।
विगतमा हामी सबै मिलेर ठूल्ठूला सफलताहरू प्राप्त गरेको स्मरण गरौं । एकता सफलताको बाटो हो भने फुट विनासको ।
त्यसैले रिस, राग, अहंकार र बदलाभाव त्यागेर पार्टीका वैधानिक प्रकृया अन्तर्गत यो पार्टी फुटबाट जोगाउन तथा एकताबद्ध पार्न म सबै नेता कार्यकर्ताहरूलाई विशेष आह्वान गर्न चाहन्छु । पार्टीलाई फुटतर्फ धकेल्ने होइन, धैर्य र संयमका साथ एकता जोगाउने प्रयत्न गर्यौ भने मात्र हामी सफल हुन सक्छौँ र सिङ्गो राष्ट्रको नेतृत्व गर्न सक्छौं । त्यसैले टुट-फुट र विभाजन होइन एकता गर्ने गराउने कार्यमा अगाडी बढौं भन्ने सबैमा आह्वान गर्न चाहन्छु ।
धन्यवाद !
