क्यानडामा लगातार तीन दिन कीर्तिमान भंग हुने गरी गर्मी भएपछि डढेलो लागेको छ । 

गर्मी बढेर एक समयमा ४९.६ डिग्री सेल्सियस पुगेको थियो । 

बुधवार भ्यानकुभरभन्दा १५३ किलोमिटर उत्तरपूर्वमा डढेलो लागेर एउटा नगर समेत सखाप पारेको छ । डढेलो तीव्र गतिमा लागेपछि अधिकारीहरूले मानिसलाई ठाउँ सर्नका लागि आदेश दिन समेत भ्याएनन् । 

उपत्यकामा कालो बाक्लो मुश्लो भरिएको देखेपछि स्थानीयहरूले जे भेटिन्छ त्यही समाते अनि दौडिए । त्यसको केही घन्टापछि अधिकांश भवनहरू आगोको शिकार बने । 

‘हाम्रो सानो नगर लीटन स्वाहा भयो,’ एडिथ लोरिङ–कुहांगाले फेसबूकमा लेखिन् । उनी सुटकेस, सिरानी र कम्प्युटर केस समातेर दौडिन् । आगोका कारण ठूलो विस्फोट भए पनि उनी आफ्नो पर्स लिनका लागि दौडिइन् । 

‘हामीले सबैजनालाई वाहनमा राख्यौं र गाडी कुदायौं । लीटनमा बिजुलीबत्ती वा इन्टरनेट केही पनि थिएन र सबैजना आफन्तको खोजी गरिरहेका थिए,’ उनले लेखिन् । ‘यो भयावह विनाश हो । म सबैजना स्तब्ध छौं । समुदायका सदस्यहरूले सबै कुरा गुमाइसकेका छन् ।’

त्यस ठाउँमा अहिले गर्मी केही घटेको भए पनि क्यानडाका पश्चिमी प्रान्तहरूमा उखरमाउलो गर्मीको असर देखिन थालेका छन् । गर्मीले गर्दा मानिसहरूको मृत्यु हुने र डढेलो फैलिने डर बढ्दै गएको छ । 
 

लीटन नगरका बासिन्दालाई आगलागी हुन सक्ने चेतावनी त दिइएको थियो तर यति छिटो आइपुगेर नगर नै सोत्तर पार्ला भनी अधिकारीहरूले सोचेकै थिएनन् । चर्को हावा चलेकाले आगो बढ्दै गएर केही क्षणभित्रै भवनहरू स्वाहा बनाएको थियो ।

जलवायु परिवर्तन तथा विश्व तापक्रममा वृद्धिका कारण क्यानडा जस्तो चिसो ठाउँमा पनि भयंकर गर्मी हुन थालेको विज्ञहरू बताउँछन् ।