वेस्ट इन्डिजको भ्रमणमा रहेको अस्ट्रेलियाले दोस्रो टी२० मा पनि पराजय बेहोरेको छ । 

नेपाली समयअनुसार आइतवार बिहान सम्पन्न खेलमा वेस्ट इन्डिज ५६ रनले विजयी भएको हो । 

टस हारेर ब्याटिङ गरेको वेस्ट इन्डिजले निर्धारित २० ओभरमा १९६ रन बनाएको थियो । शिमरोन हेटम्यरले ३६ बलमा ६१ रनको विस्फोटक ब्याटिङ गरेका थिए । ड्वेन ब्राभोले ४७ रन बनाए ।

जवाफमा अस्ट्रेलियाले पूरा २० ओभर खेल्न सकेन र १४० रनमा अलआउट भयो । मिचेल मार्शको ५४ रनको योगदान बाहेक अन्य ब्याट्स्म्यान खासै चलेनन् । खातै नखोली म्याथ्यु वेड आउट भएपछि कुनै पनि बेलामा अस्ट्रेलिया सम्हालिन सकेन । 

वेस्ट इन्डिजका लागि हेडन वाल्शले तीन विकेट हात पारे भने शेल्डन कोट्रेलको खातामा दुई विकेट गयो । 

पहिलो टी२० मा वेस्ट इन्डिज १८ रनले विजयी भएको थियो । 

कुल पाँच टी२० मध्ये पहिलो दुईमा विजयी भएर वेस्ट इन्डिजले शृंखला जित्ने लक्षण देखाएको छ । तेस्रो एकदिवसीय नेपाली समयअनुसार मंगलवार बिहान खेलिनेछ ।