नेपाली सेनाद्वारा सञ्चालित काठमाडौंको छाउनीस्थित वीरेन्द्र अस्पतालमा काठमाडौं महानगरवासी मिर्गौला रोगीका लागि निःशुल्क हेमोडायलाइसिस सेवा सुरु भएको छ ।

काठमाडौं महानगरपालिका प्रमुख विद्यासुन्दर शाक्य र प्रधानसेनापति पूर्णचन्द्र थापाले निःशुल्क हेमोडायलाइसिस सेवाको आइतवार संयुक्त रुपमा शुभारम्भ गरे । 

काठमाडौं महानगरपालिकाको आर्थिक सहयोग र नेपाली सेनाको व्यवस्थापनमा वीरेन्द्र अस्पताल छाउनीमा मिर्गौलाका सेरो नेगेटिभ बिरामीका लागि निःशुल्क हेमोडायलाइसिस सेवा सुरु भएको हो । 

महानगर प्रमुख शाक्यले महानगरवासीलाई स्वास्थ्य सेवा दिने प्रयास स्वरुप अस्पतालसँग सहकार्य गरेको बताए । 

मिर्गौलासम्बन्धी रोग लाग्नुभन्दा अगावै त्यसलाई रोक्न वा रोग लागिसकेको भए थप बिग्रन नदिन यसै वर्षदेखि ‘स्वस्थ मिर्गौला–स्वस्थ काठमाडौं’ कार्यक्रमअन्र्तगत ३२ वटै वडामा प्रारम्भिक परीक्षण सेवा सुरु भइसकेको बताए । 

महानगरले सेवा सञ्चालनका लागि आवश्यक भौतिक पूर्वाधार, आठवटा हेमोडायलाइसिस मेसिन, एउटा रिप्रोसेसिङ मेसिन, पानी शुद्धीकरण प्लान्ट र अन्य मेडिकल उपकरणहरू जडान गर्न अस्पताललाई तीन करोड रूपैयाँ अनुदान उपलब्ध गराएको छ । 

यससम्बन्धी सहकार्यका लागि महानगरपालिका र अस्पतालबीच पाँच वर्षका लागि २०७६ पुस २ गते नै सम्झौता भएको थियो ।

सम्झौताअनुसार जडान गरिएका आठवटा हेमोडायलाइसिस मेसिनबाट हरेक हप्ता दुई सिफ्टमा सेवा सञ्चालन गर्न सकिन्छ । तत्कालका लागि ४८ जना बिरामीलाई साताको दुई पटक सेवा प्रदान गर्न सकिने अस्पतालका प्रमुख सहायक रथी डा. अरुण शर्माले बताए । 

यो सेवा विपन्न र सेरोनेगेटिभ दीर्घ चरणको मिर्गौला रोगी, क्रोनिक किड्नी डिजिज स्टेज–५ पुगिसकेकाहरूका लागि मात्रै हो । यो सेवा लिन बिरामीले महानगरपालिकाको सिफारिस लिनुपर्ने हुन्छ । 

अहिले देशभरिका ६५ वटा अस्पतालहरूमा चालु रहेका ४९८ वटा डायलाइसिस मेसिनबाट तीन  हजार ५१६ जना विपन्न वर्गका बिरामीहरूले निःशुल्क हेमोडायलाइसिस सेवा प्राप्त गरिरहेको तथ्यांक छ । 

निःशुल्क डायलाइसिस गर्दा राज्यले प्रतिबिरामी वार्षिक दुई लाख ६० हजार रूपैयाँ खर्च व्यहोरिरहेको छ । 

नेपालमा हरेक वर्ष दुई हजार ६०० जना मिर्गौलाका नयाँ बिरामी थपिइरहेको सरकारी तथ्यांक छ ।