०२ साउन २०८३, शनिबार
नेपाली कांग्रेस केन्द्रीय पदाधिकारीको बैठक शनिवार बिहान ९ बजे पुनः बस्ने गरी स्थगित भएको छ । प्रधानमन्त्री तथा कांग्रेस सभापति शेरबहादुर देउवाको निवास बूढानीलकण्ठमा बैठक बसेको थियो ।
बैठकमा महाधिवेशन केन्द्रित छलफल भएको तर, निर्णयमा नपुगिसकेको कांग्रेस प्रवक्ता विश्वप्रकाश शर्माले जानकारी दिए ।
बैठकमा क्रियाशील सदस्यता छानबिन समिति संयोजक रमेश लेखक र निर्वाचन समितिका संयोजकले प्रतिवेदन प्रस्तुत गरेका थिए ।
आगामी साउन १२ गतेबाट कांग्रेसको १४ औं महाधिवेशनको कार्यतालिका लागू गर्नुपर्ने तर, अहिले असम्भव जस्तो देखिएकाले त्यस विषयमा के गर्ने भन्ने बारेमा शनिवारको बैठकमा निर्णय हुने शर्माले बताए ।
‘कार्यतालिकामा सामान्य हेरफेरको प्रस्ताव आएको छ । आजको बैठकमा निर्णय भएको छैन । भोलि बिहान फेरि बैठक बसेर निर्णयमा पुग्छौं,’ कांग्रेस सहमहामन्त्री डा. प्रकाशशरण महतले भने ।
महाधिवेशन भदौ १६ मा नै हुने गरी संशोधित कार्यतालिका ल्याउन बैठकमा सभापतिले निर्देशन दिएको शर्माले जानकारी दिए । ‘१४ औं महाधिवेशन भदौ १६ बाट पछाडि जान सक्दैन ।
तोकिएको मितिमा महाधिवेशन गर्नका लागि के कसरी कार्यतालिका मिलाउन सकिन्छ छलफल गरेर प्रस्ताव ल्याउन सभापतिले भन्नुभएको छ,’ शर्माले भने ।
महाधिवेशनको मिति नजिकिएको भए पनि कांग्रेसको क्रियाशील सदस्यता छानबिन समितिले क्रियाशील सदस्यताको टुंगो लगाउन सकेको छैन ।
आजको बैठकमा समितिका संयोजक रमेश लेखकले साउन १० गतेसम्ममा प्रतिवेदन दिन सक्ने बताएका थिए ।
यस्तै सभापति देउवाले पार्टीको क्रियाशील सदस्यता छानबिन निष्पक्ष ढंगले गर्न दबाब स्वरुप अनशन बस्दै आएका पार्टीका नेता, कार्यकर्ताको माग तत्काल सुनुवाइ गर्न क्रियाशील सदस्यता छानबिन समितिलाई निर्देशन दिएका छन् ।
