३१ असार २०८३, बुधबार
नेकपा (एकीकृत समाजवादी)का प्रदेश १ का सांसदहरू बुधवार मात्रै प्रदेश निर्वाचन आयोगमा जाने भएका छन् ।
मगलवार जाने तयारी गरे पनि झापा, मोरङ, सुनसरीलगायतका जिल्लामा रथ तान्ने छुट्टी प्रदेश सरकारले दिएपछि उनीहरू बुधवार मात्रै आयोगमा जान लागेका हुन् ।
आयोगमा जानु भन्दा अगाडि रणनीति तयार गर्न भन्दै चार–पाँच दिनदेखि नेकपा (एस) तिर खुलेका सांसदहरू होटलमा बसिरहेका छन् । विराटनगरको एक होटलमा उनीहरू बसिरहेका छन् ।
त्यही होटलमा केन्द्रीय सदस्य महेश रेग्मी, घनेन्द्र बस्नेत, राजेन्द्र राईलगायतका नेताहरूले सांसदहरूलाई विभिन्न आश्वासन दिइरहेका छन् ।
प्रदेश १ सरकार परिवर्तनका लागि विपक्षी गठबन्धनको छलफलसमेत त्यही होटलमा हुने गरेका छन् ।
मुख्यमन्त्रीको चर्चामा रहेका राजेन्द्र राई पनि होटलमा बस्ने गरेका छन् । आफ्ना पक्षमा सांसदलाई तान्नका लागि उनले कुनै कसरत बाँकी राखेका छैनन् ।
राई होटलबाटै सांसदहरूलाई फोन गर्नेदेखि माधव नेपालसम्मलाई गफ गराउनसमेत उनी सक्रिय छन् ।
भीम आचार्य नेतृत्वको सरकार ढाल्नका लागि राई पर्दा अगाडि देखिएका छन् । तपाईंको नेतृत्वमा सरकार कहिले बन्छ भन्ने लोकान्तरको प्रश्नमा राईले भने, ‘मेरै नेतृत्व भन्ने छैन केन्द्रमा भएको गठबन्धनले निर्णय गर्ने हो । सम्भवतः प्रदेश १ हाम्रै पार्टीको भागमा पर्छ होला ।’
जसको नेतृत्वमा सरकार बने पनि असोजको पहिलो हप्तामा मुख्यमन्त्री कार्यालयमा गठबन्धन नेतृत्वको मुख्यमन्त्रीको नाम लेखिसकिएको हुने उनको दाबी छ । उनले अहिलेको सरकार अल्पमतमा परिसकेको समेत बताए ।
