जम्मु कश्मीरमा आतंकवादीहरूले विगत १५ दिनमा पाँच मुसलमान सहित ११ जना सर्वसाधारणको हत्या गरेका छन् । 

यसैबीच आतंकवादीहरूका प्रमुखले गैरमुसलमानलाई छानीछानी मार्नका लागि निर्देशक दिएको खबर हिन्दुस्तान टाइम्सले दिएको छ । स्थानीय आतंकवादीहरूलाई गैरमुस्लिमको नाम दिइएको बताइएको छ । 

समाचारमा शीर्ष अधिकारीलाई उद्धृत गर्दै गैरमुस्लिमको नाम आतंकवादीहरूलाई दिइएको र उनीहरूलाई सुरक्षित राखिने बताइएको छ । 

अहिले कश्मीरमा तीनदेखि चार लाख मानिस बाहिरबाट आएर काम गरिरहेका छन् । आतंकवादीहरूले बाहिरबाट आएका मानिस मात्र नभई स्थानीय अल्पसंख्यकहरूलाई पनि तारो बनाइरहेका छन् । 

उत्तर प्रदेश र बिहारका मजदूरहरू पनि आतंकवादीको आक्रमणको निशाना बनेका छन् । 

भारतका गुप्तचर निकायहरूका अनुसार, कश्मीरका अल्पसंख्यक समुदाय र प्रवासी मजदूरहरूमा डर उत्पन्न गर्ने रणनीति आतंकवादीहरूले बनाएका छन् । 

उनीहरूलाई तर्साएर कश्मीरबाट बाहिर पठाउन खोजिएको देखिन्छ । यसरी उनीहरूलाई तारो बनाउँदा कश्मीरको पर्यटन उद्योग तहसनहस हुनेछ । 

श्रीनगरको मुख्य बजार हुजूरी बागमा फार्मेसी चलाउने एमएल बिन्द्रु र बटमालोका एक मुसलमानको हत्या आतंकवादीहरूले गरेपछि मिडियाको ध्यान त्यतातिर गएको हो । पछिल्लोपटक आइतवार कुलगाममा तीनजना बिहारी मजदूरमाथि आक्रमण गरिएको थियो । 

साम्प्रदायिक हिंसा भड्काएर अशान्ति फैलाउने उद्देश्य आतंकवादीहरूले लिएको भारतका गुप्तचर अधिकारीहरू बताउँछन् ।