नेपाल बारले प्रधानन्यायाधीश चोलेन्द्र शमशेर जबराले राजीनामा नदिए आन्दोलन गर्ने घोषणा गरेको छ । बारले मंगलबार साँझ एक विज्ञप्ति जारी गर्दै जबरालाई प्रधानन्यायाधीश पदबाट राजीनामा दिन औपचारिकरुपमा आग्रह गर्दै उनले राजीनामा नदिएको खण्डमा नेपालभरका बार एकाइमार्फत आन्दोलनका कार्यक्रम घोषणा गर्ने स्पष्ट गरेको हो ।

बारले सल्लाहकार समिति समेतको सुझावको आधारमा प्रधानन्यायाधीशको राजीनामा मागेको हो । ‘प्रधानन्यायाधीशज्यू निरन्तररुपमा एकपछि अर्को विवादमा तानिनु भएको र त्यस्तो विवादले समग्र न्यायपालिकाको प्रतिष्ठा र गरिमामा गम्भीर आँच आइ स्वतन्त्र न्यायपालिकाप्रति नै गम्भीर प्रश्न उठेकाले अब उप्रान्त उहाँबाट संवैधानिक दायित्व पुरा हुन नसक्ने र यस विषय र विकराल परिस्थितिलाई समाधान गरी सबैको विश्वास जितेर समस्या समाधान गर्न असफल र अक्षम भइसक्नु भएकाले वर्तमान गतिरोधलाई अन्य गरी सहज निकाय दिन जबराले अबिलम्ब राजीनामा दिइ मार्गप्रशस्त गर्नु नै उपयुक्त हुन्छ भनि नेपाल बारको सल्लाहकार समितिको बैठकको सुझाव समेतको आधारमा ५ गतेदेखिको निरन्तरको बैठकको निर्णयअनुसार उहाँलाई पदत्याग गर्न आह्वान गर्दछौँ,’ बारको विज्ञप्तिमा भनिएको छ ।

बारले न्यायपालिकामा हस्तक्षेप बढ्दै जानुमा संविधानमा भएका सर्वोच्च अदालतका न्यायाधीशको संसदीय सुनुवाइ सम्बन्धी व्यवस्था, संवैधानिक परिषद्मा प्रधानन्यायाधीशको संलग्नताको व्यवस्था र न्याय परिषद्को संरचनासम्बन्धी व्यवस्था लगायतका व्यवस्थाहरु पनि जिम्मेवार रहेको ठहर गरेको छ ।