नेपाल बार एसोसिएसनले प्रधानन्यायाधीश चोलेन्द्र शमशेर जबरासँग वार्ता नगर्ने अडान लिएको छ ।

न्यायपालिकामा विकृति तथा विसंगतिको नाइके र संरक्षक नै जबरा रहेकाले उनीसँग कुनै वार्ताको औचित्य नभएको बारले बताएको छ । 

सर्वोच्च अदालत परिसरमा भएको धर्नापछि बार प्रांगणमा आयोजित कार्यक्रमलाई सम्बोधन गर्दै नेपाल बार एसोसिएसनका अध्यक्ष चण्डेश्वर श्रेष्ठले न्यायपालिकाको गरिमा कायम राख्न नसक्ने प्रधानन्यायाधीशसँग वार्ता नहुने बताएका हुन् । 

‘तपाईंसँग वार्ता हुँदैन, राजीनामा गर्नुस् । बाँकी न्यायाधीश र सरोकारवालासँग वार्ता गर्छौं,’ श्रेष्ठले भने ।

अध्यक्ष श्रेष्ठले न्यायपालिकामा देखिएका विसंगतिको प्रवक्ता र पक्षपोषकको रूपमा उभिएका प्रधानन्यायाधीशको राजीनामा मुख्य शर्त रहेको बताए । 

श्रेष्ठले प्रधानन्यायाधीशको वक्तव्यको जवाफ लिखित रूपमै दिने पनि बताएका छन् । 

सर्वोच्च बारका अध्यक्ष पूर्णमान शाक्यले बारको धर्ना यथावत रहने बताए । ‘न्यायपालिकाको विकृति विसंगतिको कारक प्रधानन्यायाधीश भनेर प्रवेश निषेध गरेको भनेपछि उहाँसँग वार्ता गर्ने सम्भावना छैन । पद त्याग गरेपछि अब आउने नेतृत्वसँग न्यायपालिका सुधारका लागि वार्ता हुन्छ,’ शाक्यले भने । 

उनले बारको धर्ना कार्यक्रम यथावत चलिरहने र धर्नामा सहभागी हुन ९० वटै बार इकाइलाई आह्वान गरिने बताए । 

यसअघि सोमवार प्रधानन्यायाधीश जबराले वक्तव्य प्रकाशित गरी नेपाल बार र सर्वोच्च बारलाई वार्तामा आउन आग्रह गरेका थिए । 

प्रधानन्यायाधीशको राजीनामा माग गरेको बारले उनलाई सर्वोच्चमा प्रवेश रोक लगाउने भन्दै शुक्रवारदेखि सर्वोच्चको गेटमा धर्ना दिइरहेको छ । 

धर्ना मंगलवार पनि जारी रहने बार अध्यक्ष श्रेष्ठले बताए ।