२२ जेठ २०८३, शुक्रबार
कोरोनाभाइरसको नयाँ भेरिएन्ट ओमिक्रोनले संसारमा सनसनी फैलाइरहेको छ ।
बीसभन्दा बढी देशमा यो भेरिएन्ट भेटिएको पुष्टि भइसकेको छ ।
यस नयाँ भेरिएनटका बारेमा पहिलोपटक जानकारी दिने दक्षिण अफ्रिकी वैज्ञानिकहरूले यसबाट धेरैजसो युवा प्रभावित भएको बताएका छन् । ओमिक्रोनले हलुका बिरामी मात्र बनाउने भनी बताइएको भए पनि त्यस निष्कर्षमा पुगिहाल्नु हतारो हुने दक्षिण अफ्रिकी वैज्ञानिकहरूको भनाइ छ ।
यसका बारेमा थप जानकारी जुटाइरहेको र दुईदेखि तीन हप्तामा जानकारी आउने उनीहरूले बताए ।
यस भेरिएन्टका कारण रोगी भएका मानिस सबै युवा हुन् । त्यसको आयु ४० वा त्यसभन्दा कम छ ।
नेसनल इन्स्टिच्युट फर कम्युनिकेबल डिजीजले विगत २४ घन्टामा दक्षिण अफ्रिकामा नयाँ केसको दैनिक संख्या बढेर ८५ सय ६१ पुगेको जानकारी दिएको छ ।
दक्षिण अफ्रिकी सरकार र वैज्ञानिकहरूले नोभेम्बर २५ मा कोरोनाको नयाँ भेरिएन्टको घोषणा गरेका थिए । त्यसपछि विश्व स्वास्थ्य संगठनले यसलाई ओमिक्रोन नाम दियो ।
नयाँ भेरिएन्ट पत्ता लागेपछि दक्षिण अफ्रिकाबाट हुने उडानमा कतिपय देशहरूले प्रतिबन्ध लगाएका छन् ।
