प्रतिष्ठित उद्यमी एवं संविधान सभाका पूर्व सदस्य विमल केडियाले मंगलवार साँझ पत्रकार सम्मेलन आयोजना गरे ।

काठमाडौंको लाजिम्पाटस्थित होटल एम्बास्डरमा आयोजित पत्रकार सम्मेलनमा अनौठो दृश्य देखियो ।

पत्रकार सम्मेलन हलको एक कुनामा ‘सार्थक विवाह उत्सव, एक नयाँ पहल’ लेखिएको ब्यानर राखिएको थियो । 

अर्को कुनामा केही लेखिएको थियो । जसमा पत्रकार सम्मेलन आयोजना गर्नुको उद्देश्यबारे जानकारी थियो, तर अनौपचारिक जस्तै ।

बीचको भित्तामा राखिएको नोटिस बोर्डमा केडियाले छोराको विवाह समारोहको केही झलकहरू तस्वीरमा राखेका थिए ।

त्यहाँ उपस्थित पत्रकारहरूमध्ये केहीले त्यो हेरेर केडियाले के भन्न लागे भनेर चासो देखाइरहेका थिए ।

केही समय ढिला गरी शुरू गरिएको कार्यक्रममा केडियाले भने, ‘पत्रकार साथीहरू, यो एक किसिमको अन्तक्र्रिया जस्तै हो भन्ने मलाई लागेको छ ।’

विषयवस्तुमा प्रवेश गर्नुअघि उनले आफ्नो केही अनुभव र मान्यताहरू सुनाए ।

‘मैले समाजप्रति, देशप्रति र प्रकृतिप्रति जिम्मेवार हुनुपर्दछ भन्ने मान्यता शुरूदेखि नै राख्दै आएको छु । विभिन्न समयमा विभिन्न उतारचढावका बावजुद आज यो कार्यक्रम गर्ने रमाइलो मौका प्राप्त गरें ।’ 

उनले कार्यक्रमलाई विषयवस्तुमा प्रवेश गराउँदै सुनाए, ‘यसो हेर्दा यो के हो जस्तो लाग्छ, तर लेखाइ र देखाइभन्दा पनि माथि छ यो फिलिङ्स, मैले हजुरहरूलाई फिलिङ्स शेयर गर्न खोजेको हुँ ।’

‘...यहाँ हामी भेट्दा एउटा कन्फ्युजन देखियो, यो कन्फ्युजन मेरा साथाीभाइ र घरपरिवारमा पनि देखिएको थियो,’ कार्यक्रममा विषय प्रवेश गराउँदै केडियाले भने । 

आवश्यक परिवर्तनलाई आत्मसाथ गर्नुपर्नेमा उनले जोड दिए ।

गत मंसिर २५ गते केडियाले आफ्नो छोरा आश्विनको विवाह सम्पन्न गरे ।

आश्विनको विवाह भारत घर भएकी श्रीया मित्तलसँग गरिएको थियो । 

सो विवाह उत्सवलाई सोचेजस्तै सार्थक बनाएपछि केडियाले आफ्नो अनुभव साट्दै थिए । 

उनको यस अभियान जस्तै अरुले पनि उत्सवमा केही न केही समाज वा मुुलुकको लागि योगदान पुग्ने सार्थक काम गर्नुपर्नेमा जोड दिनका लागि उनले पत्रकार सम्मेलन आयोजना गरेका थिए ।

उत्सवमा सार्थकताको खोजी 

केही समयअघि छोराको विवाहको मिति तय भएपछि उनले केही नयाँ गर्नका लागि निकै सोचेको सुनाए । 

पत्रकार सम्मेलनमा उनले भने,‘उत्सवलाई मैले नकारात्मक रूपमा लिएको होइन । तर त्यसलाई सार्थक कसरी बनाउने भन्ने कुरा मैले लिएँ । विवाह हुन बाँकी नै थियो । विवाह उत्सवलाई कसरी सार्थक बनाउने भन्ने मैले सोच्न थालेँ । कस्तो कार्याक्रम गर्ने भन्ने एउटा पक्ष थियो भने अर्को पक्ष यो विषय एउटा कल्चरको रूपमा मात्रै मनाउने भन्ने हो र ? अब नयाँ केही गरौँ भन्ने पनि लाग्यो ।’

उत्सवमा हामी गाडी, मोटरसाइकल या केहीमा जान्छौँ । रमाइलो गर्छौँ । स्रोतसाधन खर्च भएको छ, समय लागेको छ, त्यसको कुनै भ्याल्यू छैन ? शुभकामना दियौँ यो राम्रो कुरा हो ।

उनी भन्छन्, ‘मैले कहाँसम्म अनुभव गरेको छु भने केही पुराना साथी ४/५ जना एउटा कुनातिर गइन्छ, पुराना कुरा गरिन्छ, एकछिन खुसी हुन्छौँ । तर मलाई त्यतिले पुगेन । मलाई त्यसमा पनि केही सार्थकता होस् भन्ने लाग्यो ।’

उनले छोराको विवाहको अवसरमा दुईवटा कुरामार्फत उत्सवलाई सार्थकता बनाउने सोच बनाए ।

पहिलो सोच –छोराको विवाहमा विभिन्न धर्ममा आस्था राख्ने धर्म गुरुहरूलाई बोलाएर सामूहिक रूपमा आशिर्वचन दिलाउने र अर्को सोच– विवाह उत्सवमा राजधानी वरिपरिको कुनै ठाउँमा वृक्षरोपण गरेर त्यसलाई अध्ययन सेन्टर बनाउने ।

उनको यो सोचलाई उनको परिवारले पनि साथ दिए । 

त्यसपछि विवाह उत्सव आयोजना गरियो । 

केडियाले हिन्दु, शिख, जैन, बुद्ध, क्रिस्चियन र इस्लाम धर्मगुरुलाई विवाह उत्सवमा बोलाएर एउटै मञ्चबाट छोरालाई आशिर्वाद दिलाए । 

मुलुकका विभिन्न भागमा बस्दै आएका सबै धर्मावलम्वीहरू सँगै मिलेर बसेको सन्देश दिनका लागि यो सोच बनाएर काम गरेको केडियाले सुनाए ।

के थियो एक नयाँ पहल ?

केडियाले निकै सोचेर उत्सवका मनाउँदा नयाँ पहल गरेको सुनाए । 

काठमाडौंको तारकेश्वर नगरपालिका अन्तर्गत महाकालीमाई मन्दिर परिसरमा वृक्षरोपण गरिएको केडियाले बताए । 

वृक्षरोपणका साथै बिरुवा हुर्किएपछि अध्ययन पार्क स्थापना परियोजनाको परिकल्पना समेत गरेको उनको भनाइ छ । 

‘वृक्षरोपण त धेरैले गरेका छन्, तर त्यो प्रभावकारी भएको छैन, त्यसैले यसलाई एउटा परियोजनाकै रूपमा लैजाने सोचका साथ काम गरियो,’ केडियाले भने ।

यो विवाह उत्सवकै क्रममा त्यहाँ उपस्थित पाहुनाकै नाममा वृक्षरोपण गरेको उनले सुनाए । 

‘हरेक उत्सवमाा केही न केही प्रभावकारी सामाजिक कामको प्रतिवद्धता गर्ने र त्यसलाई अगाडि बढाउने हो भने उत्सव सार्थकता हुन्छ भन्ने लागेको छ,’ उनले भने ।

मन्दिर परिसरमा गरिने वृक्षारोपणमा पहिलो चरणमा ५ हजार बिरुवा रोप्ने र त्यसमा ५० लाख खर्च हुने उनको अनुमान छ ।

वृक्षारोपण र बोटानिकल अध्ययन केन्द्रको परिकल्पना अगाडि बढ्दै जाँदा अहिले धेरैले सकारात्मक प्रतिक्रिया दिइरहेको उनले सुनाए ।

परिसरमा लोपन्मुख जातका बिरुवाहरू समेत रोप्ने सोचमा रहेको उनी बताउँछन् । 

विवाह समारोहमा मुलुकका प्रधानमन्त्रीदेखि व्यापारी, उद्योगी र विभिन्न क्षेत्रका ख्याती कमाएका व्यक्तिहरू समेत सरिक भएका थिए । 

उनीहरूले समेत केडियाले थालनी गरेको अभियानलाई कतै न कतै लागू गराउने विश्वास दिलाएको उनले सुनाए । 

वृक्षारोपणपछि आफूले सोचेको जस्तै विवाह उत्साव सार्थक भएको केडिया बताउँछन् । 

यस्ता कामलाई सबैले निरन्तरता दिनुपर्ने उनको भनाइ छ ।