स्याङ्जामा बुधवार १६ महिने बालकको चक्कु प्रहार गरेर हत्या गरिएको छ । बालकको हत्या आरोपमा एउटै घरको कोठामा बस्ने ३३ वर्षीय जितेन्द्र गुरुङलाई प्रहरीले पक्राउ गरेको छ । 

जिल्ला प्रहरी कार्यालय स्याङ्जाका प्रवक्ता डीएसपी राजेन्द्रप्रसाद अधिकारीका अनुसार चक्कु प्रहारबाट बालककी ५ वर्षीया दिदी पनि घाइते भएकी छन् । 

उनीहरू वालिङ नगरपालिका–१२ सिर्सीबोटका रणमाया गुरुङका छोराछोरी हुन् । 

ज्याला मजदुरीको काम गर्दै आएका जितेन्द्र कोठामा एक्लै बस्दै आएको प्रारम्भिक अनुसन्धानमा खुलेको प्रहरीले जनाएको छ । 

‘जितेन्द्रका परिवार विदेशमा बस्दै आएको भन्ने खुलेको छ,’ डीएसपी अधिकारीले भने, ‘उनको मानसिक अवस्थामा ठिक देखिएको तर के कारणले चक्कु प्रहार गरे अझै खुलेको छैन ।’