वीरगञ्ज महानगरपालिका-१३, तेजारथ टोलमा रहेको मधेश प्रदेशका मुख्यमन्त्री लालबाबु राउतको निजी निवासमा ढुंगा प्रहार गरेको आरोपमा एक जनालाई प्रहरीले पक्राउ गरेको छ । 

प्रहरीका अनुसार वीरगञ्ज–१ का २६ वर्षीय सुमन पटेललाई पक्राउ गरिएको हो । 

वीरगञ्ज महानगरपालिका-८, घण्टाघरबाट प्रदेश २ को नाम मधेश प्रदेश र राजधानी जनकपुर निर्णय भएको विरोधस्वरुप निस्केको मोटरसाइकल र्‍यालीले नगर परिक्रमा गर्ने क्रममा र्‍यालीसँगै मोटरसाइकलमा आएका पटेलले मुख्यमन्त्रीको निजी निवासमा ढुंगा प्रहार गरेको प्रहरीले जनाएको छ । ढुंगा प्रहारबाट घरको २ वटा सिसा फुटेर क्षति भएको छ । 

वडा प्रहरी कार्यालय बिर्ताबाट खटिएको प्रहरीले उनलाई तत्काल पक्राउ गरी आपराधिक उपद्रवसम्बन्धी कसूरमा अनुसन्धान अगाडि बढाइएको जिल्ला प्रहरी कार्यालय पर्साले जनाएको छ ।