नेकपा माओवादी केन्द्रका केन्द्रीय सदस्य एवं (वाईसीएल) नेपालका इञ्चार्ज रामप्रसाद सापकोटा 'दीपशिखा'ले एमसीसी पारित गर्नेसँग सत्ता साझेदारी पनि नहुने बताएका छन् ।

आइतवार सामाजिक सञ्जाल फेसबूकमार्फत धारणा सार्वजनिक गर्दै दीपशिखाले एमसीसी माओवादीले कुनै पनि हालतमा संसदबाट पारित नगर्ने प्रस्ट पारे ।

'अरू धेरै थाहा भएन, नेकपा माओवादी केन्द्रले एमसीसी सदनबाट पारित गर्दैन । आज र अहिले होइन, एमसीसी पारित गर्नेसँग सत्ता साझेदारी हुने कुरै भएन । कूटनीतिक र ट्याक्टिकल विषयलाई त्यही रूपमा बुझौं ।'

एमसीसी सम्झौता अनुमोदनका लागि प्रधानमन्त्री शेरबहादुर देउवा र माओवादी अध्यक्ष प्रचण्डले फेब्रुअरी २८ (फागुन १६)सम्मको समयसीमा मागेको पत्र सार्वजनिक भएपछि माओवादी नेता/कार्यकर्ताले तीव्र प्रतिक्रिया जनाइरहेका छन् ।

यस्तै नेता नारायणकाजी श्रेष्ठ प्रकाशले पनि यथास्थितिमा एमसीसी पारित गर्ने पक्षमा आफूहरू नरहेको प्रतिक्रिया दिइसकेका छन् ।