३१ असार २०८३, बुधबार
युक्रेनको सुखोई सु–२७ विमानलाई रोमानियाका दुईवटा एफ–१६ लडाकू विमानहरूले बिहीवार रोकेको त्यहाँको रक्षा मन्त्रालयले जनाएको छ ।
उक्त विमानलाई पूर्वी रोमानियामा रहेको बाकाउ शहर नजिक रहेको जंगी अड्डामा ओर्लन निर्देशन दिइएको मन्त्रालयले बयान जारी गरेर जनाएको छ ।
युक्रेनी लडाकू विमानका पाइलटले आफूलाई रोमानियाली अधिकारीसमक्ष आत्मसमर्पण गरेका छन् । बुखारेस्टले घटनाको कानूनी परिणामको मूल्यांकन गरिरहेको छ । यसको विस्तृत जानकारी पछि उपलब्ध गराउने रक्षा मन्त्रालयको कथन छ ।
रुसले युक्रेनमाथि सैन्य कारवाही शुरू गरेकै समयमा यो घटना भएको हो । मस्कोले युक्रेनका जंगी एयरफील्ड र विमानलाई हवाई आक्रमणको तारो बनाएको छ ।
नेटोको सदस्य रोमानियाले सबै किसिमका पूर्व सतर्कता अपनाइरहेको र छिमेकी मुलुकको घटनालाई निगरानी गरिरहेको जनाएको छ ।
