पशुपति क्षेत्र विकास कोषले महाशिवरात्रिका अवसरमा पशुपति क्षेत्रमा लाग्ने १ हप्ते मेलाका लागि प्रतिस्पर्धाबाट कम्पनी छनोट गरेको छ ।
 
कोरोना महामारीका कारण २ वर्ष रोकिएको मेला यस वर्ष सञ्चालन गरिने कोषका प्रवक्ता रेवतीरमण अधिकारीले जानकारी दिए ।

कोरोना संक्रमण फैलिने डरले विक्रम संवत् २०७६/७७ मा मेला स्थगित गरिएको थियो । यस वर्ष कोरोनाबाट बच्न जारी स्वास्थ्य मापदण्ड पूरा गरेर सावधानी साथ मेला सञ्चालन गरिने उनले बताए ।
 
महाशिवरात्रिको भोलिपल्ट अर्थात् फागुन १८ गतेदेखि १ हप्ता पशुपति क्षेत्रस्थित वनकालीमा मेला सञ्चालन गरिने छ । मेलाका लागि सबैभन्दा बढी रकम कबोल गर्ने नेपाल मेला महोत्सव सञ्चालन संघलाई १५ लाख १५ हजार रुपैयाँमा मेला सञ्चालनको जिम्मेवारी दिइएको कोषले जनाएको छ ।

मेलामा बालबालिका एवं वयस्कका लागि पिङ लगायतका खेलका साथै विभिन्न सामग्रीको किनमेल पनि गर्न सकिने गरी कक्ष सञ्चालन गरिने जनाइएको छ ।