काठमाडौं, २२ असार— कांग्रेसको पडक क्षेत्र मानिएको दाङमा यो पटक नेकपा एमाले बलियो देखिएको छ । दाङका १० तहमध्ये दुई उपमहानगरपालिकासहित ६ तहमा नेकपा एमाले विजयी भएको छ ।
बिहिबार सम्पन्न मतगणनाअनुसार तुल्सीपुर उपमहानगरपालिकामा कांग्रेसलाई हराउँदै घनश्याम पाण्डेय विजयी भएसँगै दाङमा एमालेको जित संख्या ६ पुगेको हो ।
निकटम प्रतिष्पर्धी कांग्रेसका उम्मेदवारलाई गेहेन्द्र गिरीलाई हराउँदै एमालेका उम्मेदवार पाण्डे मेयरमा निर्वाचित भएका हुन्।
पाण्डेले २२ हजार ८ सय ५७ मत पाएका छन् भने निकटतम् प्रतिष्पर्धी गिरीले १८ हजार ९ सय ३ मत ल्याए।
त्यस्तै उपमेयरमा माया आचार्यले २१ हजार ३७ मत ल्याइन् भने उनका निकटतम् प्रतिष्पर्धी कांग्रेसका देवका नेपालीले २० हजार १ सय ८५ मत ल्याइन्।
यसअघि नै घोराही उपमहानगरपालिकामा एमाले नै विजयी भएको थियो ।
दाङ एमालेले दुई उपमहानगरसहित ६ तहमा बाजी मार्दा कांग्रेस तीन तहमा विजयी भएको छ । माओवादी केन्द्रले भने एक तहमै चित्त बुझाउनु परेको छ ।
कांग्रेस नेता खुमबहादुर खड्काको गृहजिल्ला समेत रहेका कारण विगतमा दाङ कांग्रेसको पकडमा रहँदै आएको थियो । तर विगतको इतिहासलाई उल्ट्याउँदै यो पटक एमाले अगाडि देखिएको हो ।
०७० सालको संविधानसभा निर्वाचनमा दाङमा कांग्रेसले पाँचवटै निर्वाचन क्षेत्र जित्दै क्लिन स्विप गरेको थियो । त्यतिबेला एमालेभन्दा झन्डै दोब्बर हाराहारी कांग्रेसका उम्मेदवारहरुले मत पाएका थिए ।
यसो त ०४८, ५१, ५६, ६४ र ७० को निर्वाचनमध्ये ०६४ मा माओवादी आएबाहेक बाँकी सबैमा कांग्रेसले जितेर आफ्नो गढको रूपमा स्थापित गर्दै आएको थियो ।
