२२ जेठ २०८३, शुक्रबार
सोलुखुम्बुको खुम्बु पासाङल्हामु गाउँपालिका–२ मा पर्ने हरियाली सामुदायिक वनमा लागेको डढेलो नियन्त्रणमा आएको छ ।
आइतवार दिउँसोबाट लागेको डढेलो ४ दिनपछि नियन्त्रणमा आएको वडा नम्बर २ का वडाध्यक्ष आङ फुर्वा शेर्पाले जानकारी दिए ।
हेलिकप्टर, स्थानीय, नेपाल प्रहरी र नेपाली सेनाको सक्रियतामा ४ दिनपछि डढेलो नियन्त्रणमा लिन सफल भएको गाउँपालिकाले जनाएको छ ।
स्थानीयले आगो नियन्त्रणमा लिन नसकेपछि सोमवारदेखि अग्नि नियन्त्रक सिम्रिक एयरको हेलिकप्टर प्रयोग गरिएको वडाध्यक्ष शेर्पाले बताए ।
गाउँपालिकाको पहलमा ल्याइएको हेलिकप्टरले आगो नियन्त्रणका लागि ९५ हजार लिटर पानी प्रयोग गरेको थियो ।
आगो तीव्र गतिमा फैलिँदा धुवाँका कारण सोमवार बिहान करीब १ घण्टा तेञ्जिङ हिलारी विमानस्थल लुक्ला बन्द गर्नुपरेकोे थियो । आगोका कारण सल्ला, उत्तीसलगायत विभिन्न प्रजातिका बोटबिरुवा नष्ट भएको भए पनि के कति क्षति भयो भन्ने यकिन गर्न बाँकी रहेको गाउँपालिकाले जनाएको छ ।
आगलागीका कारणबारे अनुसन्धानसँगै क्षतिको यकिन विवरण तयार गर्ने काम भइरहेको वडाध्यक्ष आङफुर्वा शेर्पाले बताए । आगोका कारण नाक्चुङ गाउँका १३ घर उच्च जोखिममा परेका थिए । बस्ती जोगाउनका लागि सबै संयन्त्र प्रयोग गरी काम गरेको गाउँपालिका कार्यबाहक अध्यक्ष टासील्हामु शेर्पाले जानकारी दिए ।
