३० असार २०८३, मंगलबार
रुसी सैनिकहरूले आनन्द लिनका नागरिकको जथाभावी हत्या गरेको युक्रेनका राष्ट्रपति भोलोदीमीर जेलेन्स्कीले आरोप लगाएका छन् ।
संयुक्त राष्ट्रसंघको सुरक्षा परिषद्लाई मंगलवार सम्बोधन गर्दै जेलेन्स्कीले रुसविरुद्ध आरोप लगाएका हुन् । उनले सुरक्षा परिषद्को कार्यादेशमा समेत प्रश्न उठाएका छन् ।
राजधानी किएभबाहिरको नगर बुचाको भ्रमण गरेको एक दिनपछि जेलेन्स्कीको भावुक सम्बोधन आएको हो । बुचाका सडकमा लाशहरूको तस्वीर देखेर संसार नै स्तब्ध बनेको छ ।
रुसी सैनिकहरूले बुचा शहर छोड्ने क्रममा पूरा परिवारहरूलाई मारेको, मानिसको घाँटी काटेको, महिलाको बलात्कार गरेको र उनीहरूकै बालबालिका अगाडि मारेको आरोप जेलेन्स्कीले लगाए । रुसको यो कारवाही आतंकवादी समूहको जस्तो भएको जबकि रुस सुरक्षा परिषद्को सदस्य भएको उनको भनाइ छ ।
त्यसपछि उनले सुरक्षा परिषद्लार्य निन्दा गर्दै सोधे, ‘सुरक्षा परिषद्ले दिनुपर्ने सुरक्षा कता छ ? युद्ध रोक्न र शासन्त बहाल गर्न बनाइएको विश्वको महत्त्वपूर्ण संस्था प्रभावकारी छैन ।’
‘महिला तथा सज्जनवृन्द, म तपाईंहरूलाई राष्ट्रसंघको बडापत्रको धारा १, च्याप्टर १ को स्मरण गराउन चाहन्छु । यो संगठनको उद्देश्य के हो ? शान्ति बहाल गर्ने र त्यसमा अडिग रहने यसको उद्देश्य हो । अहिले बडापत्रको ठाडो उल्लंघन भइरहेको छ । धारा १ कै उल्लंघन भइरहेको छ भने अरू धाराको के काम ?’
रुसले युक्रेनमाथि आक्रमण गरेको मिति फेब्रुअरी २४ देखि अप्रिल ४ सम्म युक्रेनमा कम्तीमा १४ सय ८० नागरिक मारिएको र कम्तीमा २१ सय ९५ जना घाइते भएको राष्ट्रसंघका एक अधिकारीले बताए ।
