ललितपुरको बागमती गाउँपालिका– ६ की राधा (नाम परिर्वतन) ललितपुर महानरपालिकाको धापाखेल बस्दै आएकी थिइन् ।

काठमाडौं उपत्यकामा बसेर पढाइ अगाडि बढाइरहेकी राधा उच्च शिक्षाका लागि जापान जाने योजनामा थिइन् । 

उपत्यकामा सामान्य रोजगारी गरिरहेकी उनलाई एक दिन ‘तानाकायोका’ नामको फेसबूक आईडीबाट ‘फ्रेन्ड रिक्वेस्ट आयो । प्रोफाइल खोलेर हेर्दा जापानी नागरिकजस्तो देखिने भएकाले सहजै स्वीकार गरिन् । त्यसको केही महिना फेसबूक म्यासेन्जरमा कुराकानी भयो । त्यसक्रममा ती व्यक्तिले नेपालीलाई जापान लैजाने गरेको बताए ।

उनले त्यो कुरा आफ्ना अन्य ४ जना साथीहरूलाई पनि बताइन् । उनीहरू पनि जापान जाने योजना थिए । ती व्यक्तिले भिसाको प्रक्रियाका लागि भन्दै पैसा मागे ।

उनीहरूले अम्बिका थापाको नाममा रहेको माछापुच्छ्रे बैंकको खाता र शुभद्रा परियारको नाममा रहेको नेपाल बैंकको खातामा खातामा पैसा हालिदिए ।

राधाले १४ लाख ८० हजार १२८ रुपैयाँ पठाइन् । पहिलो साथीले ५ लाख ६३ हजार २०३, दोस्रो साथीले ८ लाख ५३ हजार ४२०, तेस्रो साथीले ८ लाख ९२ हजार ३८५ र चौथो साथीले १ लाख ७९ हजार ८६० गरी ३९ लाख ६८ हजार ९९६ रुपैयाँ अम्बिका थापाको खातामा पठाए ।

पैसा पठाइसकेपछि उनीहरू आफ्नो भिसा आउने आशामा बसिरहेका थिए । उनीहरूले ती व्यक्तिलाई समय–समयमा सम्पर्क गरिरहेका थिए । तर एकदिन ‘पूजा राई, सरन राई, दीपिका केसी, सुमित्रा केसी र राजेन्द्र ढकालसँग पैसा छ, उनीहरूले लगेका हुन्, उतै माग्नु’ भन्दै ती व्यक्ति सम्पर्कविहीन भए ।

बल्ल आफूहरू ठगिएको थाहा पाएका उनीहरू महानगरीय प्रहरी अपराध महाशाखामा उजुरी दिन पुगे । त्यसपछि प्रहरीले जिल्ला अदालत काठमाडौंबाट पक्राउ पूर्जी लिएर खोजी शुरू गर्‍यो ।

प्रहरीले खोजिरहेको भन्ने थाहा पाएर मकवानपुरको हेटौंडा उपमहानरपालिका– १२ पदमपोखरीकी शुभद्रा परियार, इलाम सूर्योदय नगरपालिका– ४ की पूजा राई र सिन्धुपाल्चोकको बाह्रबिसे नगरपालिका– ९ का राजेन्द्र ढकाल महाशाखामा आफैँ उपस्थित हुन आए ।

प्रहरीले भक्तपुर चाँगुनारायण– ७ खरीपाटीबाट दीपिका केसीलाई पक्राउ गरेको थियो । 

उनीहरूमाथि अनुसन्धान सकेर महानगरीय प्रहरी परिसर काठमाडौंले सरकारी वकिलमार्फत जिल्ला अदालत काठमाडौंमा मुद्दा दायर गरेको छ । मुद्दा विचाराधीन छ ।

यो त प्रतिनिधिमूलक घटना मात्र हो । काठमाडौं उपत्यका अपराध अनुसन्धान कार्यालयमा अनलाइन ठगीका दैनिक ७ वटासम्म उजुरी आउने गरेका छन् ।

कार्यालय प्रवक्ता प्रहरी उपरीक्षक (एसपी) कृष्ण कोइरालाका अनुसार अघिल्लो आर्थिक वर्षमा अनलाइन ठगीका कुल २८८ उजुरी दर्ता भएका थिए ।

यो वर्ष त्यो संख्या निकै बढेको छ । चैत महिनासम्ममा नै ४ सयभन्दा बढी उजुरी परिसकेको उनले बताए ।

‘४/५ प्रकारका ठगीका केसहरू आउने गरेका छन् । अनलाइनबाट सामान किन्नेदेखि चिठ्ठा पर्‍यो भन्ने प्रलोभनमा ठगिएका उजुरी आउने गरेका छन्,’ एसपी कोइरालाले लोकान्तरसँग भने ।

उनका अनुसार सामाजिक सञ्जालमार्फत जागिरको प्रलोभन दिने र उनीहरूबाट तालिम लगायतका बहानामा ठग्नेक्रम पनि बढेको छ । 

अनलाइनबाट चिनजान गरेर क्यानडा, जापान लगायतका देशमा पठाइदिन्छु भन्दै मोटो रकम लिएर फरार हुने गरेको पनि देखिएको छ । कतिपय उजुरी सामाजिक सञ्जाल ह्याक गरेर आफन्तसँग पैसा मागेको भन्ने व्यहोराको रहेको एसपी कोइरालाले बताए ।

अपराध अनुसन्धान कार्यालयमा १५ सय ठगिएकोदेखि १ करोड ८० लाख ठगिएकोसम्मका उजुरी आएका छन् । पछिल्लो समय अनलाइनबाट सामान किन्दा ठगिएको भन्ने उजुरी बढी आएका छन् ।

‘अनलाइनबाट महंगो मोबाइल, घडी, ल्यापटप सस्तोमा पाइने लोभमा ठगिनेको संख्या धेरै छ । प्रहरी त्यस्ता सामाजिक सञ्जाल र व्यक्तिहरूबाट जोगिन समेत अनुरोध गर्दछ,’ एसपी कोइरालाले लोकान्तरसँग भने ।