०२ असार २०८३, मंगलबार
मोरङको बेलबारी नगरपालिका–७ काफ्ले टोलमा छोराले बुवाको हत्या गरेका छन् ।
स्थानीय ३१ वर्षीय वासुदेव कार्कीले बिहीवार दिउँसो ६२ वर्षीय बुवा जयबहादुर कार्कीको हत्या गरेका हुन ।
अंशबण्डा सम्बन्धी विवाद हुँदा वासुदेवले बुबा, आमा र भाइ तीर्थराजसँग विवाद गरेका थिए ।
जयबहादुरले छोरीलाई जग्गा बेचेपछि विवाद भएको पाइएको ईलाका प्रहरी कार्यालय बेलबारीका इन्स्पेक्टर खगेन्द्र धमलाले बताए । त्यही विवादलाई लिएर वासुदेव र भाइ तीर्थराजबीच भएको झगडा मिलाउन गएका जयबहादुरलाई वासुदेवले आँगनको ढुंगामा पछारेको प्रहरीले जनाएको छ ।
दिउँसो १२ः३० बजेतिर छोराले आँगनमा पछारेपछि गम्भीर घाइते भएका वृद्ध जयबहादुरलाई उपचारका लागि विराटनगरको विराटनगर अस्पतालमा ल्याएको थियो । अस्पतालमा ल्याउनेबित्तिकै चिकित्सकले जयबहादुरलाई मृत घोषणा गरेका प्रहरीले जनाएको छ ।
बुवाको हत्यामा संलग्न वासुदेवलाई प्रहरीले पक्राउ गरेर घटनाको अनुसन्धान अघि बढाएको छ । अनुसन्धानका लागि भाइ तीर्थराजलाई पनि नियन्त्रणमा लिइएको मोरङ प्रहरीले जनाएको छ । वासुदेवले आमा ५८ वर्षीया उमादेवी कार्कीमाथि समेत कुटपिट गरेका प्रहरीले जनाएको छ ।
प्रहरीका अनुसार छोराको कुटपिटबाट उमादेवीको अनुहार र टाउकोमा चोट लागेको छ । वासुदेव इटहरीमा बस्दै आएका थिए ।
