३० जेठ २०८३, शनिबार
निर्वाचन आयोगले राजनीतिक दलका शीर्ष नेताबाट आएको द्वेषपूर्ण अभिव्यक्तिलाई गम्भीर ध्यानाकर्षण भएको जनाएको छ ।
आयोगले त्यस्तो अभिव्यक्तिलाई गम्भीर रूपमा लिएर विश्लेषण गरिरहेको जनाएको छ । पछिल्लो समय राजनीतिक दलका शीर्ष नेताहरूबाट एक अर्काप्रति लाञ्छना लगाउने र चरित्रहत्या गर्ने किसिमले नै द्वेषपूर्ण टिप्पणी आएको विषयमा आयोगले यस्तो धारणा राखेको हो ।
आयुक्त रामप्रसाद भण्डारीले पछिल्ला दिनमा राजनीतिक दलका शीर्ष नेताबाट एक अर्कालाई लक्षित गरी चरित्र हत्या गर्ने किसिमले नै अभिव्यक्ति आएको सम्बन्धमा आयोगको गम्भीर ध्यानाकर्षण भएको बताए ।
निर्वाचन आयोगले विभिन्न माध्यमबाट आउने त्यस्ता अभिव्यक्तिलाई प्रमाणका रूपमा सङ्कलन गरिरहेको छ । आयुक्त भण्डारी केन्द्रीय आचारसंहिता अनुगमन समितिका संयोजक हुन् ।
आयोगले सामाजिक सञ्जालमा आउने द्वेषपूर्ण अभिव्यक्ति वा आचारसंहिता आकर्षित हुने उल्लङ्घनका घटनाको अभिलेख राख्न र सिफारिस गर्न कार्यदल गठन गरेको छ ।
उक्त कार्यदलको सिफारिस र आयोगमा परेको उजुरीका आधारमा समितिले कारबाही प्रक्रिया अगाडि बढाउने कार्यविधि छ । गोरखापत्र दैनिकमा इश्वरचन्द्र झाले खबर लेखेका छन् ।
