२२ असार २०८३, सोमबार
वैशाख ३० गते हुने स्थानीय तह निर्वाचनका लागि मतदातासँग अपिल गर्न आइतवार नेकपा एमालेले पार्टी कार्यालयमा पत्रकार सम्मेलनको आयोजना गरेको थियो । मतदातालाई गरिएको अपिलमा एमालेले नेपाली कांग्रेसको धेरै आलोचना गरेको छ ।
कांग्रेसप्रति किन यति धेरै आक्रामक भनेर पत्रकारले एमाले अध्यक्ष केपी ओलीलाई प्रश्न सोधे । जवाफ दिने क्रममा ओलीले महाभारतको प्रसंग कोट्याए । ‘महाभारतको युद्धमा कौरव पक्षमा को–को सेना थिए, त्यसको हिसाबकिताब र उनीहरूको दुर्गुणको बारेमा महाभारतमा खासै चर्चा हुँदैन । कौरवको बारेमा चर्चा हुन्छ, दुर्योधनको बारेमा चर्चा हुन्छ । यहाँ पनि त्यस्तै भएको होला,’ ओलीले भने ।
२०४६ सालको परिवर्तनपछिका ३२ वर्षमा २० वर्ष सरकारको नेतृत्व र संयुक्त सरकारमा सामेल हुनेसमेत गरेर २७ वर्ष कांग्रेस सत्तामा बसे पनि केही काम नगरेको आरोप ओलीले लगाए ।
राणा, राजा र कांग्रेसको सरकारले कहिल्यै देशमा विकास नगरेको ओलीले आरोप लगाए । ‘विगतमा राजासँग घाँटी जोडिएको भन्ने कांग्रेसले अहिले दक्षिणपन्थी अवसरवादीसँग घाँटी जोडेर सरकार चलाएको छ,’ ओलीले भने ।
