२२ असार २०८३, सोमबार
युक्रेनी सेनाले कृष्ण सागरमा रहेको स्नेक आइल्यान्डलाई हवाई तथा समुद्र मार्गबाट नियन्त्रणमा लिन कोशिश गरेको भए पनि त्यसमा विफल भएको रुसले दाबी गरेको छ ।
त्यसक्रममा उसले उल्लेख्य रूपमा हताहती बेहोर्नुपरेको रुसको रक्षा मन्त्रालयले सोमवार जानकारी दिएको छ । अमेरिका र बेलायतका सल्लाहकारहरूले यस कारवाहीको योजना बनाएको पनि उसले बताए ।
‘विगत दुई दिनमा युक्रेन सरकारले आकाश र समुद्रको बाटो भएर स्नेक आइल्यान्डमा अवतरण गर्नका लागि प्रयास गरेको थियो । कृष्ण सागरको उत्तरपश्चिमी भागलाई नियन्त्रणमा लिन उक्त टापु महत्त्वपूर्ण छ,’ रुसी सेनाका प्रवक्ता मेजर जनरल इगोर कोनाशेनकोभले बताए ।
शनिवार युक्रेनका राष्ट्रपति भोलोदीमीर जेलेन्स्कीले यस आक्रमणको आदेश आफैं दिएको कोनाशेनकोभले बताए । अमेरिका र बेलायतका सल्लाहकारहरूको सुझावबमोजिम किएभमा शीर्ष सैन्य अधिकारीहरूले टापुलाई नियन्त्रणमा लिन खोजेको उनको भनाइ छ ।
उक्त टापुमा रहेका रुसी सुरक्षा बलहरूले युक्रेनी आक्रमणलाई रोकेको र शत्रुलाई ठूलो क्षति गराएको कोनाशेनकोभको दाबी छ । त्यसक्रममा युक्रेनका चारवटा लडाकू विमान नष्ट भएको र चारवटा हेलिकप्टर समेत ध्वस्त भएको उनले बताए ।
