बलिउड सुपरस्टार शाहरुख खानका छोरा आर्यन खानलाई नार्कोटिक्स कन्ट्रोल ब्यूरोले कोर्डेलिया लागूऔषध मुद्दामा सफाइ दिएको छ । 

गत अक्टोबर महिनामा आर्यन र अन्य व्यक्तिहरू विलासी जहाजमा लागूऔषध सेवन गरेको आरोपमा पक्राउ परेका थिए । अदालतका कैयौंपटक सुनुवाइ, अनेकौं नाटक र २६ दिन न्यायिक हिरासतमा बसेपछि आर्यनलाई बम्बे उच्च अदालतले धरौटीमा रिहा गर्ने आदेश दिएको थियो । उनी अक्टोबर ३० मा जेलबाट निस्केका थिए । 

एनसीबीले लागूऔषधको मुद्दा हेर्ने विशेष अदालतमा दायर गरेको अभियोगपत्रमा आर्यन खानको नाम नभएपछि उनले सफाइ पाएको पुष्टि भएको हो । 

आर्यनबाहेक यस मुद्दामा १९ अन्य आरोपित थिए । दुईजनाबाहेक अन्य सबै आरोपितहरू धरौटीमा छुटेका छन् । 

आरोपितहरूलाई नार्कोटिक्स ड्रग्स यान्ड साइकोट्रोपिक सब्स्टान्सेस ऐनका विभिन्न दफाबमोजिम अभियोग लगाइएको छ । उनीहरूले लागूऔषध राखेको, सेवन गरेको, खरिदबिक्री गरेको लगायतका अभियोग छन् ।