मेलम्ची खानेपानी आयोजनाको मुख्य सुरूङमा पानी पठाउन बन्द गरिएको छ । 

मेलम्चीको अम्बाथानमा रहेको सुरूङको मुख्य ढोका मंगलवार बिहानबाट बन्द गरेर पानी पठाउन बन्द गरिएको हो । 

अब सुरूङको उक्त ढोका हिउँदमा मात्रै खुल्ने मेलम्ची खानेपानी आयोजनाले बताएको छ । 

पानी पर्ने क्रम बढेको र सुरूङमा धमिलो पानी प्रवेश हुन थालेकाले वर्षा याम भरी सुरूङमा पानी हाल्न बन्द गरिने मेलम्ची खानेपानी विकास समितिका सूचना अधिकारी राजेन्द्र प्रसाद पन्तले बताए । 

खानेपानी विकास समितिले धेरै पानी पर्ने र खोलाको बहाब बढ्ने अवस्था भएसँगै सुरूङ बन्द गर्ने तयारी गरेको थियो । 

अघिल्लो वर्ष असार १ मा आएको बाढीले सुरूङमा क्षति पुर्‍याएको थियो । सुरूङमा बाढी पसेपछि सफा गर्न गत चैत महिनासम्म लागेको थियो । अब सम्भवत कात्तिकमा मात्रै सुरूङ खोलिने समितिले बताएको छ ।