लुम्बिनी प्रदेशकी राज्यमन्त्री विमला वलीले गृहजिल्ला दाङको एक घरमा छिरेर आतंक मच्चाएकी छन् । 

तुलसीपुर उपमहानगरपालिका–५, सब्जीमण्डीस्थित एकराज बस्नेतको घरमा पीएसओसहित प्रवेश गरेर उनकी श्रीमती मीना भण्डारी र उनकी छोरीलाई कुटपिट गरी तोडफोडमा उत्रिएकी हुन् । मन्त्री वली तोडफोड र कुटपिटमा उत्रिएपछि प्रहरी परिचालन भएको थियो । 

एकराजसँग मेरो सम्बन्ध छ, खोइ एकराज भन्दै मीनालाई कुटपिट गरेको स्थानीयले बताएका छन् । सुरक्षा गार्डसहित एकराजको घरमा प्रवेश गरी आफ्नी बुहारी मीना र छोरीलाई कुटपिट गरेर आतंक मच्चाएको एकराजका दाजुले बताए । 

मीनाले घरमा राज्यमन्त्री बिमला प्रवेश गरेर छोरी र आफूलाई कुटपिट गरेको भन्दै जेठाजुलाई फोन गरेकी थिइन् । ‘बिमला र एकराजको बाहिर सम्बन्ध के कस्तो हो थाहा भएन । घरमा आएर बुहारीलाई कपडा नै च्यातिने गरी बुहारीलाई कुट्नुभयो । दराज फोड्नुभयो । पर्दा फालिदिनुभएको छ । गेट धकेल्दै सबैलाई थर्काउँदै प्रवेश गर्नुभएको छ,’ उनले भने, ‘परपुरुषसँग सम्बन्ध राख्नेले बुझ्नुपर्ने हो । अहिले आएर सीधै मेरो बिहे भएको छ । मलाई फसाए भन्नुहुन्छ ।’ 

मीनाले ‘मेरो एकराज खै, मेरो एकराज खै’ भन्दै आफूलाई कुटपिट गरेको बताइन् । ‘कोठाभित्र मन्त्री विमला प्रवेश गरिन्,’ मीनाले भनिन्, ‘कपडा फालिन् । फालेका कपडा मैले किनिदिएकी हुँ भन्दै गालामा समेत हानिन्, कपडा च्यातिदिइन् । नानी (छोरी)लाई पनि हानिन् ।’ 

मन्त्री विमला वली तोडफोडमा उत्रिएपछि स्थानीयले प्रहरीलाई खबर गरेका थिए । त्यसपछि प्रहरी आएर वलीलाई नियन्त्रणमा लिएको छ ।

दाङका प्रहरी प्रमुख एसपी सुरेश काफ्लेले राज्यमन्त्री वलीलाई नियन्त्रणमा लिएर इलाका प्रहरी कार्यालय तुलसीपुरमा राखिएको लोकान्तरलाई जानकारी दिए । ‘स्थानीय महिलासँग झगडा गरेपछि स्थानीय नियन्त्रणमा लिएका रहेछन् । हामीलाई खबर गरेपछि प्रहरी पुगेर उहाँलाई पक्राउ गरिएको छ । घटनाको बारेमा थप अनुसन्धान भइरहेको छ,’ एसपी काफ्लेले लोकान्तरसँग भने । 

काफ्लेले एकराज बस्नेत र बिमलाको प्रेम सम्बन्धको बारेमा भने आफूलाई अहिलेसम्म जानकारी नभएको बताए । 

विमला र एकराजको गत वर्षको भदौमा चुम्बन गरेको तस्विर बाहिर आएको थियो । त्यसपछि हंगामा मच्चिएको थियो । बस्नेत वाईसीएल कार्यकर्ता हुन् । त्यो तस्वीर बाहिर आएपछि पनि एकराजले बिमला र आफूबीचको सम्बन्ध बताउन चाहेका थिएनन् । बिमला प्रदेश सभाको उपनिर्वाचन दाङबाट निर्वाचित सांसद हुन् । 

उनका श्रीमान उत्तरकुमार वलीको सडक दुर्घटनामा मृत्यु भएपछि तत्कालीन नेकपाबाट उनी निर्वाचित भएकी थिइन् । वली श्रीमान उत्तरको मृत्यु भएपछि एकराजसँग नजिक रहेको पछिल्ला घटनाक्रमले देखाएको छ । 

सूर्य चिह्नबाट निर्वाचित उनी कहिले एमाले त कहिले माओवादी हुँदै आएकी थिइन् । शंकर पोखरेल नेतृत्वको सरकार ढलेपछि उनले माओवादी रोजेकी थिइन् । उनले आफूलाई अपहरण गरेको भन्दै बुटवलमा पत्रकारसम्मेलन समेत गरेकी थिइन् ।