नेकपा एकीकृत समाजवादी (एस)का वरिष्ठ नेता झलनाथ खनालले मन्त्री फिर्ता बोलाउने पार्टी निर्णयमा पुनर्विचार नहुने बताएका छन् । 

पार्टीको निर्णय सबैले मान्नु पर्ने उनले बताए ।  

शुक्रवार बसेको पार्टी पोलिटव्युरो बैठकपछि कुरा गर्दै खनालले पार्टी सचिवालयले गरेको निर्णय कार्यान्वयन नहुनु दुखद भएको बताएका हुन् । 

‘पार्टीको सचिवालयले निर्णय गरेको छ, स्थायी कमिटीले अनुमोदन गरेको छ । फेरि केन्द्रीय कमिटीमा यसरी कुरा उठ्नु सहज कुरा होइन,’ खनालले भने, ‘पार्टी निर्णय नमान्नेलाई पार्टीले आवश्यक कारबाही गर्छ । पुनर्विचार गर्दैनौँ ।’

मन्त्री फिर्ता बोलाउने निर्णय सम्बन्धमा पोलिटव्युरो बैठकमा कुरा नउठेको र केन्द्रीय कमिटीले यो निर्णयमा तलमाथि नगर्ने उनले बताए । 

एसका उपाध्यक्ष समेत रहेका बागमती प्रदेशका मुख्यमन्त्री राजेन्द्र पाण्डेले भने शनिवार बेलुकासम्म पूराना मन्त्री घर फर्किने दावी गरेका छन् । 

स्वास्थ्य मन्त्रीसमेत रहेका नेकपा एसका नेता विरोध खतिवडाले मन्त्री पद छाड्न तयार रहेको प्रतिक्रिया जनाएका छन् ।