३१ जेठ २०८३, आइतबार
आकाशे पानी नपरेपछि बाँकेमा रोपेको धान सुक्न थालेको छ । साउनको पहिलो हप्ता सकिन लाग्दा पनि वर्षा नभएपछि बाँकेका विभिन्न स्थानमा रोपिएका धान सुक्न लागेका हुन् ।
खेतमा रोपिसकेका धान सुक्न थालेपछि केही किसानले धान जोगाउने उपाय खोजिरहेका छन् । सिँचाइको सुविधा नपुगेका क्षेत्रका किसानले वैकल्पिक माध्यमबाट खेतमा पानी पुर्याउने उपाय खोजिरहेका छन् । बाँके जानकीका किसानहरू ढलको पानी सिँचाइ गरेर धान रोपेका छन् ।
जानकी ३ बाँकेका किसान बिर्जाप्रसाद जरवटले रोपेको धान पानी नपरेका कारण खेतमा सुक्दै गएको बताए । उनले समयमा मलखाद पनि नपाएको गुनासो सुनाउँदै सिँचाइको प्रबन्ध नभएकाले किसान मारमा परेको बताए । सिँचाइ सुविधा नभएपछि पम्पिङसेटबाट नालाको पानीले हाली रोपेको धान पनि सुक्न थालेको अर्का किसान दीलिपकुमार जरवटले बताएका छन् ।
कृषि ज्ञान केन्द्रका अनुसार बाँके जिल्लामा ३६ हजार ५ सय हेक्टरमा धान खेती गरिन्छ । यो वर्ष समयमा पानी नपर्दा असारको अन्तिमसम्म ४० प्रतिशत मात्र धान रोपाइँ भएको केन्द्रले जनाएको छ । गत वर्ष यो अवधिमा झन्डै ९० प्रतिशत धान रोपाइँ भएको थियो ।
कृषि ज्ञान केन्द्र बाँकेका कृषि अधिकृत दिनेशप्रसाद भट्टराईका अनुसार असार १५ ताका परेको पानीले रोपेको धान पनि सुक्न थालेको छ । आकाशबाट पानी नपरेका कारण खोला नालामा पनि पानी सुक्दै गएकाले धान रोप्न समस्या भएको उनले बताए ।
राप्ती नदी, खोलानाला र सिक्टा सिँचाइको सुविधा हुने राप्तीसोनारी, बैजनाथ, खजुरा, जानकी, डुडुवा गाउँपालिकामा २५ देखि ४० प्रतिशत धान रोपाइँ भएको छ भने नरैनापुर गाउँपालिकामा १० प्रतिशत, कोहलपुर नगरपालिका क्षेत्रमा १५ र नेपालगञ्ज उपमहानगरपालिका क्षेत्रमा २० प्रतिशत मात्र धान रोपाइँ भएको कृषि ज्ञान केन्द्रले जनाएको छ ।
